Tojikiston shimolidagi So‘g‘d viloyatining Qirg‘iziston bilan chegaradosh bo‘lgan Isfara shahri va uning tarkibiga kiruvchi Chorko‘h qishlog‘idagi to‘qqizta ko‘cha chegaradagi to‘qnashuvlarda halok bo‘lganlarning ismi bilan nomlandi, deb yozadi Asia-Plus Isfara ma’muriyati ijtimoiy rivojlanish va jamoatchilik bilan aloqalar bo‘limi mudirasi Shahira Yo‘ldoshevaga tayanib.
Uning so‘zlariga ko‘ra, geografik va jismoniy obyektlarni chegaradagi nizolar qurbonlari va mehnat faxriylari sharafiga nomlash haqidagi qaror 13-iyun kuni Isfara Xalq deputatlari majlisining o‘n ikkinchi sessiyasida qabul qilingan.
Qarorda ta’kidlanishicha, bu odamlar “jamoatchilik va Vatan manfaatlarini o‘z manfaatlaridan ustun qo‘yib, mamlakat chegaralarini, o‘z uylarini va qishlog‘ini himoya qilish uchun jonlarini fido qilgan”.
Ushbu qaror asosida, ko‘chalarga, xususan, o‘z xizmat vazifalarini bajarish chog‘ida chegaradagi ziddiyatda halok bo‘lgan Isfara markaziy kasalxonasi tez yordam haydovchisi, 2021-yil apreli oxirida Qirg‘iziston bilan chegaradagi qonli qirg‘inda qurbon bo‘lgan Chorko‘h qishlog‘ining sakkiz nafar fuqarosi nomlari qo‘yildi.
Shuningdek, mahalliy faollar hukumatga murojaat qilib, Voruh qishlog‘idagi ko‘chalardan biriga marhum jurnalist va Isfara sobiq hokimi Iqbol Teshayev nomini berishni so‘ragan.
Qirg‘iziston va Tojikiston chegarasi vaqti-vaqti bilan ikki mamlakat mahalliy aholisi va chegarachilari o‘rtasidagi nizolar hududiga aylanib turadi. Bunga sabab delimitatsiya qilinmagan yerlar bo‘lib, u yerlarda davlatlar o‘rtasidagi chegara qayerdan o‘tishini aniqlab bo‘lmaydi.
Chunonchi, 14-iyun kuni ertalab Qirg‘iziston va Tojikiston chegarasida otishma yuz berdi, Tojikiston tomoni granatomyot va minomyotlarni qo‘lladi. Chegaraning qirg‘iz-tojik qismidagi vaziyat keskin deb tavsiflandi. Keyinroq otishma oqibatida tojikistonlik muddatli harbiy xizmatchi halok bo‘lgani xabar berildi.
2021-yilning 28—29 aprel kunlari qirg‘iz-tojik chegarasida sodir bo‘lgan yirik qurolli to‘qnashuvda har ikki tomondan jami 55 kishi halok bo‘lgan, 300 ga yaqin odam jarohatlangan edi. Muzokaralar natijasida mojaroga barham berildi, shundan so‘ng Tojikiston va Qirg‘iziston umumiy chegarani delimitatsiya qilish bo‘yicha ishlarni faollashtirdi. O‘tgan yil davomida ikki davlat topografik ishchi guruhlarining bir necha uchrashuvlari bo‘lib o‘tdi, oxirgisi aprel oyi boshida o‘tkazildi.
Izoh (0)