Afg‘onistonda hukumat tepasiga kelgan “Tolibon” harakati olti oy oldin hibsga olingan besh nafar Britaniya fuqarosini ozod qildi. Bu haqda harakatning rasmiy vakili Zabihulla Mujohidga tayanib, “Interfaks” xabar berdi.
“Olti oycha avval bir qancha Britaniya fuqarolari mamlakat qonunlari va afg‘on xalqining an’analarini buzgani uchun hibsga olingan edi. Islom Amirligi (“Tolibon” o‘z hukumatini shunday ataydi) va Buyuk Britaniya o‘rtasidagi bir qator uchrashuv va muzokaralardan so‘ng mahbuslar qo‘yib yuborildi hamda vataniga qaytdi”, — deb yozadi Mujohid ijtimoiy tarmoqlarda.
“Ular Afg‘oniston qonunlariga, xalqning urf-odatlari va madaniyatiga rioya qilishga, ularni boshqa buzmaslikka va’da berishdi”, — dedi “Tolibon” vakili.
Uning so‘zlariga ko‘ra, “endi Afg‘oniston hamma uchun xavfsiz, mamlakatga hamma xayriya va turizm uchun ishonch bilan kelishi mumkin”.
Bundan oldin Britaniya Tashqi ishlar vazirligi “Tolibon” qamoqxonasidan besh nafar britaniyalik ozod etilganini e’lon qilgandi. Vazirlik bayonotida aytilishicha, ushbu shaxslar Britaniya hukumatining Afg‘onistondagi ishlariga aloqasi yo‘q, ular hukumatning tavsiyalariga zid ravishda mamlakatda sayohat qilgan. Bayonotda Britaniya fuqarolari qachon va qayerda hibsga olingani aytilmagan.
Izoh (0)