Афғонистонда ҳукумат тепасига келган «Толибон» ҳаракати олти ой олдин ҳибсга олинган беш нафар Британия фуқаросини озод қилди. Бу ҳақда ҳаракатнинг расмий вакили Забиҳулла Мужоҳидга таяниб, «Интерфакс» хабар берди.
«Олти ойча аввал бир қанча Британия фуқаролари мамлакат қонунлари ва афғон халқининг анъаналарини бузгани учун ҳибсга олинган эди. Ислом Амирлиги («Толибон» ўз ҳукуматини шундай атайди) ва Буюк Британия ўртасидаги бир қатор учрашув ва музокаралардан сўнг маҳбуслар қўйиб юборилди ҳамда ватанига қайтди», — деб ёзади Мужоҳид ижтимоий тармоқларда.
«Улар Афғонистон қонунларига, халқнинг урф-одатлари ва маданиятига риоя қилишга, уларни бошқа бузмасликка ваъда беришди», — деди «Толибон» вакили.
Унинг сўзларига кўра, «энди Афғонистон ҳамма учун хавфсиз, мамлакатга ҳамма хайрия ва туризм учун ишонч билан келиши мумкин».
Бундан олдин Британия Ташқи ишлар вазирлиги «Толибон» қамоқхонасидан беш нафар британиялик озод этилганини эълон қилганди. Вазирлик баёнотида айтилишича, ушбу шахслар Британия ҳукуматининг Афғонистондаги ишларига алоқаси йўқ, улар ҳукуматнинг тавсияларига зид равишда мамлакатда саёҳат қилган. Баёнотда Британия фуқаролари қачон ва қаерда ҳибсга олингани айтилмаган.
Изоҳ (0)