Gonkongdagi mashhur suzib yuruvchi “Jumbo” restorani Janubiy Xitoy dengizida shatakka olib ketilayotgan vaqtda cho‘kib ketdi. Bu haqda Daily Mail nashri xabar berdi.
Gonkongning mashhur tashrif joyi bo‘lgan “Suzuvchi saroy” “Jumbo Kingdom” qariyb 50 yil turgan bandargohidan tortib olingandan keyin bir necha kun o‘tib cho‘kib ketdi.
Restoran boshqaruvchisi Aberdin Restaurant Enterprises kompaniyasining ma’lumotlariga ko‘ra, u Parasel orollari deb ham ataladigan Sisha orollari yonidan suzib o‘tayotganda “noqulay sharoitlarga” duch kelgan va kema ichiga suv kirgan.
Ekipaj a’zolaridan hech kim jabrlanmagan, ammo kemani qutqarishga urinishlar muvaffaqiyatsiz tugagan.
Taxminan 80 metr uzunlikdagi suzuvchi Jumbo restorani qirq yildan ko‘proq vaqt davomida Gonkongning diqqatga sazovor joyi bo‘lib kelgandi. U 3 milliondan ortiq mehmonlarga, jumladan, Britaniya qirolichasi Yelizaveta II va aktyor Tom Kruzga kanton taomlarini taqdim etgan.
Biroq pandemiya boshlanganidan beri muassasa yopiqligicha qolayotgan edi. Yo‘qotishlar va qimmat texnik xizmatlar, shuningdek, xizmat ko‘rsatishning murakkabligi tufayli operator uni mahalliy “Okean parki”ga sovg‘a qilishga qaror qilgan, biroq muassasa ham xuddi shu sabablarga ko‘ra, restoranni qabul qilishdan bosh tortgan. Natijada boshqaruvchilar restoranni Janubi-Sharqiy Osiyodagi nomsiz shaharga olib borib, xorijliklarga biriktirishga qaror qilgan edi.
Izoh (0)