O‘zbekiston va Ozarbayjon prezidentlari 21-iyunda muzokaralar yakuni bo‘yicha ommaviy axborot vositalari vakillari uchun brifing o‘tkazdi. Bu haqda Prezident matbuot xizmati xabar qildi.
Qayd etilishicha, davlat rahbari Ozarbayjon delegatsiyasini qutlab, ikki xalq munosabatlarining tarixi bugungi ko‘p qirrali hamkorlik uchun mustahkam poydevor yaratganini ta’kidlagan.
“Ma’naviy qadriyatlarimiz, dinimiz bir, madaniyat va tilimiz o‘xshash. Ahmad Farg‘oniy va Abu Rayhon Beruniy asarlarida Ozarbayjonning sharq va g‘arb tamaddunlari bir-birini boyitgan ko‘plab shaharlari tilga olingan. Sharqshunoslik instituti fondlarida esa Nizomiy, Xoqoniy, Tusiy, Fuzuliy, Xatoiy va boshqa ozarbayjon shoir va mutafakkirlarining o‘nlab noyob qo‘lyozmalari avaylanib saqlanmoqda. Bu o‘zbek xalqi azal-azaldan ozarbayjon madaniyatiga katta hurmat va qiziqish bildirib kelayotganining yana bir dalilidir.
Tor va kengaytirilgan tarkibdagi uchrashuvlarda ikki tomonlama kun tartibidagi masalalarni batafsil muhokama qildik. Muzokaralar hamkorligimizni xalqlarimiz manfaatlari yo‘lida bundan buyon ham har tomonlama mustahkamlashga tayyorligimizni ko‘rsatdi. Hozirgina salmoqli hujjatlar to‘plami imzolandi. Ular orasida ikki tomonlama munosabatlarda yangi bosqichni boshlab beradigan Strategik sheriklikni chuqurlashtirish va har tomonlama hamkorlikni kengaytirish to‘g‘risida deklaratsiya imzolandi. Biz hamkorlikning muhim yo‘nalishlarini ham belgilab oldik”, — degan Shavkat Mirziyoyev.
Savdo va sanoat kooperatsiyasini kengaytirish hamkorlikning eng muhim ustuvor yo‘nalishi ekani qayd etilgan. Keyingi yillarda tovar ayirboshlash hajmi ancha ko‘paygan. Qo‘shma korxona va loyihalar soni 4 barobar oshgan. Tomonlar hamkorlikni tubdan faollashtirish uchun keng imkoniyatlar borligi, eng avvalo, iqtisodiyotning bir-birini to‘ldirib turishiga ishonch bildirgan.
Iqlim bilan bog‘liq xatarlar va oziq-ovqat xavfsizligi muammolari kuchayib borayotganini hisobga olib, muzokaralarda qishloq xo‘jaligi sohasidagi hamkorlikni rivojlantirish masalalariga alohida e’tibor qaratilgan. Ilmiy va innovatsion yechimlar bilan faol almashish, agrar tarmoqni raqamlashtirish bo‘yicha sheriklikni yo‘lga qo‘yish, investitsiya loyihalarini amalga oshirishga qaror qilingan.
Muzokaralarda hududlararo aloqalarni faollashtirishga ham alohida to‘xtalib o‘tilgan. Bunga joriy yil kuzida Toshkenta shahrida birinchi Hududlar forumining o‘tkazilishi xizmat qiladi. Muzokaralar yakunida Madaniyat va kino kunlarini o‘tkazish, gumanitar va turizm almashinuviga doir dasturlarini rivojlantirishga kelishib olingan.
“Ozarbayjon prezidentining tarixiy ahamiyatga ega davlat tashrifi oldinga tashlangan ulkan qadamdir. Bugun biz birodar xalqlarimiz do‘stligini yanada mustahkamlash va mamlakatlarimiz strategik sherikligini chuqurlashtirish uchun barcha sharoitlarni shakllantirdik”, – degan O‘zbekiston prezidenti.
Prezident Ilhom Aliyev taklif uchun minnatdorchilik bildirib, O‘zbekiston erishayotgan yutuqlardan xursand ekanini ta’kidlagan.
“Qardosh O‘zbekiston zaminida bo‘lib turganimdan, siz bilan ikki tomonlama munosabatlarning keng doirasi va tashqi siyosiy kun tartibidagi muhim masalalarni muhokama qilishdan mamnunman. O‘ylaymanki, bu haqiqatdan ham muvaffaqiyatli tashrif. Chunki muhokama qilingan mavzularning mohiyati, shakli, mazmuni bo‘yicha ham, biz qabul qilgan qarorlar bo‘yicha ham ushbu tashrif va kelishuvlar munosabatlarimizning yanada rivojlanishiga asos bo‘ladi”, — deydi Ilhom Aliyev
Ozarbayjon yetakchisi imzolangan hujjatlar va bugungi vazifalar ijrosi mamlakatlarimiz o‘rtasidagi munosabatlarni mustahkamlashini qayd etgan.
“Bugun biz iqtisodiy hamkorlik, biznes tuzilmalari o‘rtasidagi aloqalar, xavfsizlik va mudofaa qobiliyati, madaniy-gumanitar aloqalar to‘g‘risida fikr almashdik. Ya’ni keng ma’noda aytadigan bo‘lsak, faol hamkorligimiz uchun poydevor yaratilmoqda”, – degan u.
Davlat rahbarlari xalqaro tuzilmalar doirasidagi o‘zaro muloqot konstruktiv kechayotgani va o‘zaro qo‘llab-quvvatlash muhim ekanini ta’kidlagan.
Ilhom Aliyev tashrifining birinchi kuni
Shavkat Mirziyoyev taklifiga binoan Ozarbayjon prezidenti Ilhom Aliyev 21-iyun kuni davlat tashrifi bilan O‘zbekistonga keldi. Ozarbayjon prezidentining O‘zbekistonga tashrifi Haydar Aliyev sharafiga nomlangan ko‘cha va uning yodgorligi ochilishidan boshlandi. Shundan so‘ng Ozarbayjon prezidenti Shavkat Mirziyoyev hamrohligida “Yangi O‘zbekiston” bog‘iga tashrif buyurib, Mustaqillik monumenti poyiga gul qo‘ydi.Keyinroq Ko‘ksaroyda Ilhom Aliyevni rasmiy kutib olish marosimi bo‘lib o‘tdi. Marosimda O‘zbekiston va Ozarbayjon rasmiy delegatsiyalari a’zolari ishtirok etdi. Avval tor doirada, so‘ng kengaytirilgan tartibda muzokalar o‘tkazildi. Davlat rahbarlari strategik sheriklikni chuqurlashtirish va har tomonlama hamkorlikni kengaytirish to‘g‘risidagi deklaratsiyani imzoladi.
Tashrif O‘zbekiston va Ozarbayjon prezidentlarining Toshkentdagi Texnoparkni borib ko‘rishi, Faxriy mehmonlar xiyoboniga ko‘chat ekishi bilan davom etdi.
Izoh (0)