Toshkent viloyatida joylashgan Bo‘stonliq tumani tog‘lari, chiroyli tabiati bilan mashhur. Hududda Chimyon, Chorvoq, Amirsoy singari turistik zonalar, yuzdan ziyod arxeologik va madaniy meros obyektlari bor. Shu bois Bo‘stonliqqa dam olish uchun keluvchilar ko‘p. Afsuski, ular orasida tabiatni asrashni bilmaydiganlari ham talaygina.
Turizm va madaniy meros vazirligi va “Chorvoq” direksiyasi ommaviy axborot vositalari xodimlari uchun Bo‘stonliq tumanidagi dam olish maskanlari va ziyoratgohlarga press-tur tashkil etdi. “Daryo” muxbiri voqea joyidan reportaj tayyorladi.
Aytilishicha, Bo‘stonliqqa kuniga 10-12 ming kishi, shanba va yakshanba kunlari sutkasiga 48 ming kishi dam olish uchun kelmoqda. Ammo ularning hammasi ham tabiatni asrashni bilmaydi, o‘zi bilan olib kelgan chiqindilarni maxsus idishlarga emas, dam olish joylari va yo‘llar chetiga tashlab ketmoqda.
Tuman “Toza hudud” bo‘limi ma’lumotiga ko‘ra, 1-iyun kuni Bo‘stonliqdan 88 tonna chiqindi olib chiqilgan. “Chorvoq” direksiyasi direktori o‘rinbosari Suna Parkning ta’kidlashicha, sayyohlar soni ortgani sari tashlab ketilayotgan chiqindilar hajmi ham ko‘paymoqda.
“Qarang, Bo‘stonliq tog‘lari, tabiati naqadar chiroyli! Lekin shunday go‘zallikka yarashmagan bir xunuk holat ta’bni xira qiladi. Ya’ni ayrim sayyohlar tabiatga yomon munosabatda bo‘lmoqda. Ular dam olish maskanlariga, yo‘llar chetiga bolalar tagliklari, oziq-ovqat qoldiqlari, paketlar, plastmassa idishlar va umuman o‘nlab turdagi chiqindilarni tashlab ketmoqda. Bu juda-juda xunuk holat. Masalan, bolalar tagliklari 100 yilgacha yo‘q bo‘lmay turaveradi, nam salfetkalar 25 yil turadi. Bu agar tashlab ketilgan shunday chiqindilar olib ketilmasa, uzoq yillar davomida tabiatni ifloslantirib turaveradi degani.
To‘g‘ri, biz obodonlashtirish xizmati bilan hamkorlikda hududda keng ko‘lamdagi tozalash ishlarini olib boramiz. Ammo mas’uliyatsiz sayyohlar sabab to‘liq tozalikka erisha olmayapmiz. Chunki hudud juda ham katta. Bu yerlar bugun tozalansa, ertaga yana ifloslanmoqda”, — dedi Suna Park.
Bo‘stonliq tumani Xavfsiz turizmni ta’minlash, jamoat xavfsizligini saqlash bo‘limi katta inspektori Azamat Ahmadov hududni ifloslantirganlarga chora ko‘rilishini aytdi.
“Bo‘stonliqqa kiraverishda hudud tozaligi qoidalariga rioya qilish to‘g‘risida plakatlar ilib qo‘yilgan. Ya’ni hududga turli chiqindilar tashlab, uni ifloslantirganlar ma’muriy javobgarlikka tortiladi. Masalan, 2022-yil boshidan beri obodonlashtirish qoidalarini buzgan 120 nafar fuqaroga ma’muriy bayonnoma rasmiylashtirildi. Afsuski, tozalik qoidalariga amal qilmayotgan fuqarolar soni ko‘paymoqda.
To‘g‘ri, bu yerga kelgan hamma ham chiqindi tashlab ketmaydi. Ba’zi odamlar o‘zlari o‘tirgan joylarini ham tozalab ketishadi. Biz bundan xursand bo‘lamiz. Chunki Bo‘stonliq bizlarning uyimiz. Ba’zilar esa yo‘l chetlariga chiqindi tashlab ketishadi. Bu yerga Rossiya, Qozog‘iston, Qirg‘izistondan ham mehmonlar keladi. Sayyohlar kelganda shu joylarimizga qarab o‘zbek xalqining madaniyatiga baho berib ketadi”, – dedi inspektor.
Mas’ullarga ko‘ra, insonlarda fuqaroviy javobgarlik bo‘lmas ekan, barcha obodonlashtirish xizmati xodimlari jalb qilinsa ham hudud toza bo‘lib qolmaydi.
Izoh (0)