Namangan viloyati hokimi Shavkat Abdurazzaqov Namangan xalqaro aeroportida Haj safariga jo‘nab ketayotgan ziyoratchilar bilan uchrashdi. Bu haqda “Daryo” muxbiri Azizbek Abduvaliyev xabar bermoqda.
Abdurazzaqov ziyoratchilar bilan muloqot chog‘ida otasi muborak safarga yo‘l olgan paytlarni eslab o‘tdi.
“Adashmasam, 1994-yili bo‘lsa kerak, otamizni ziyoratga kuzatganmiz. Аeroport аtrofi to‘la odam, kimdir eshikka, yana kimdir panjaraga osilgan. Hozirgi kuzatish marosimlari qanday chiroyli, tartibli. Diniy qo‘mita va O‘zbekiston musulmonlari idorasi sa’y-harakatlari bilan Saudiyadagi sharoitlar ham a’lo darajada tashkillangan. Mehmonxona, keldi-ketdi, logistika masalalari. Qisqasi, bu yil ziyoratchilar uchun yaratilgan sharoitlar har qachongidan yaxshi. Sizlarni muborak safardan qaytishda ham shunday bayramona kutib olish nasib etsin”, — dedi Namangan hokimi.
Shundan so‘ng nuroniylar va ulamolar duoga qo‘l ochib, ziyoratchilar eson-omon Haj safariga borib kelishlari niyat qilishdi.
Ma’lumot uchun, joriy yil 20-iyun kunining o‘zida Namangan xalqaro aeroportidan Namangan —Madina yo‘nalishida 4 ta aviareys amalga oshirildi. Ularda Namangan, Farg‘ona va Andijondan jami 1000 nafarga yaqin ziyoratchilar Saudiya Arabistoniga yo‘l oldi.
Izoh (0)