2022-yilning boshlarida Eltuz va Uzmetronom nashrlari Mass-media fondi raisi Komil Allamjonovni 4,2 million dollarlik tilla va brilliant buyumlarni bojsiz olib kirishda ishtirok etgani iddao qilingan maqolalar e’lon qilgan edi.
Shundan so‘ng Komil Allamjonov buni tuhmat deb atab, “Uzmetronom.com” sayti asoschisi Sergey Yejkov ustidan huquqni muhofaza qiluvchi organlarga arz qilgandi.
21-iyun kuni Eltuz nashri maqoladagi iddaolar “to‘liq tasdig‘ini topmagani vajidan” o‘z sayti va tarmoqlardagi barcha sahifalaridan olib tashlaganini ma’lum qildi. Shuningdek, tahririyat maqolani qayta chop etgan nashrlar, jumladan Uzmetronom sayti va unga Twitter’da havola bergan “Chegara bilmas muxbirlar” tashkilotini o‘z qaroridan rasman xabardor qilgan.
“Maqolani bo‘lishgan boshqa nashr va akkauntlarning ko‘pchiligiga bu borada rasmiy bildirgi yo‘llandi. Ushbu bayonot bilan maqolani chop etishdan hech bir shaklda hech bir shaxsni obro‘sizlantirish yoki unga tuhmat qilish qasd etilmaganini ta’kidlagan holda uni bo‘lishgan, qayta chop qilgan boshqa nashr, kanal va sahifa egalaridan maqolani olib qo‘yishlarini so‘raymiz.
Maqoladagi iddaolarni qayta tekshirish jarayonida biz bilan o‘zaro tushunish asosida hamkorlik qilgan tomonlar, nashrlar va yakuniy qarorimizni hurmat qilgan Eltuz o‘quvchilariga o‘z minnatdorchiligimizni bildiramiz. Shuningdek, tahririyat reputatsion zarar uchun maqolada ko‘rsatilgan shaxs Komil Allamjonovdan uzr so‘ragan holda, uning O‘zbekistonda so‘z erkinligini ta’minlash yo‘lidagi sa’y- harakatlariga omad tilaydi.
Tahririyat Germaniya qonunchiligi asosida sud tomonidan tayinlanishi mumkin bo‘lgan jarimani to‘lashga tayyorligini bildiradi”, – deyiladi Eltuz nashri xabarida.
Buning ortidan Komil Allamjonov videomurojaat qilib, o‘z fikrlarini bildirib o‘tdi.
“So‘z erkinligi hamma xohlagan narsasini gapirishi mumkin degani emas: shaxsning qadr-qimmati, biror bir shaxs haqidagi ma’lumot berilsa, u albatta ishonchli dalillarga suyanilgan bo‘lishi kerak. Tuhmat, haqorat hech qaysi davlatda, hech qaysi jamiyatda mumkin emas. Bunga javobgarlik belgilangan. Shu jumladan O‘zbekiston qonunchiligida ham.
O‘ylaymanki, men bilan bog‘liq holatlar barcha uchun namuna bo‘ladi. Yana bir marta aytaman, so‘z erkinligi bu hamma narsa mumkin degani emas, uning tartib-qoidasi bor, o‘ziga yarasha etikasi bor. Unga amal qilsakkina biz hech qachon yutqazmaymiz”, – dedi Allamjonov.
Izoh (0)