Korrupsiyaga qarshi kurashish agentligi tomonidan o‘tkazilgan tahlillarga ko‘ra, 2022-yilning yanvar—may oylarida hokim yordamchilari tomonidan 14 ta jinoyat sodir etilgani ma’lum bo‘ldi. Mazkur jinoyatlarning asosiy qismini poraxo‘rlik, mansabdorlik va firibgarlik jinoyatlari tashkil etadi. Bu haqda agentlik matbuot xizmati xabar berdi.
Ta’kidlanishicha, bunday holatlarning oldini olish maqsadida agentlik tomonidan Iqtisodiy taraqqiyot va kambag‘allikni qisqartirish vazirligi huzuridagi Mahallabay ishlash va tadbirkorlikni rivojlantirish agentligi bilan hamkorlikda hududlar kesimida hokim yordamchilarini korrupsiyaga qarshi kurash va halollik bo‘yicha maxsus kurslarda o‘qitish tizimi yo‘lga qo‘yilgan.
Shunga muvofiq, 20-iyun sanasidan e’tiboran mamlakat hududlarida “O‘zbekiston Respublikasida korrupsiyaga qarshi kurashishning ustuvor yo‘nalishlari, davlat xizmatchilarida korrupsiyaga nisbatan murosasiz munosabatni va unga qarshi kurashish bo‘yicha ijobiy xulqni shakllantirish” mavzusidagi seminar mashg‘ulotlari boshlangan.
Seminar mashg‘ulotlarida O‘zbekistonda korrupsiyaga qarshi kurashishning ustuvor yo‘nalishlari hamda korrupsiyaning oldini olishning zamonaviy mexanizmlarini joriy etish masalalari yuzasidan batafsil ma’lumot berilmoqda.
Xususan, korrupsiyaga qarshi kurashish bo‘yicha qabul qilingan normativ-huquqiy hujjatlar, korrupsiyaning oldini olish borasida joriy etilayotgan yangi mexanizmlar, korrupsiyaga qarshi ichki nazorat tuzilmalari faoliyati, davlat xizmatchilarining mol-mulki va daromadlarini deklaratsiyalash tizimini joriy etish, manfaatlar to‘qnashuvini samarali boshqarish yo‘nalishlarida amalga oshirilayotgan ishlarga e’tibor qaratilmoqda.
Shuningdek, korrupsiya bilan bog‘liq huquqbuzarliklar va ular uchun belgilangan javobgarlik masalalari hamda hokim yordamchilari tomonidan sodir etilgan korrupsiyaviy huquqbuzarliklar tahlil qilinmoqda. Bu borada hokim yordamchilari faoliyatida korrupsiyaviy omillarni vujudga kelish sabablari hamda shart-sharoitlari, ularni bartaraf etish usullariga alohida urg‘u berilmoqda.
Avvalroq Uchtepada 30 dan ortiq hokim yordamchisi hayfsan olgani, O‘zbekistondagi 18 ta shahar va tuman hokimi o‘rinbosarlari ishdan olingani, Toshkent shahri O‘zbekistonda eng korrupsiyalashgan hudud deb topilgani to‘g‘risida xabar berilgandi.
Izoh (0)