Наманган вилояти ҳокими Шавкат Абдураззақов Наманган халқаро аэропортида Ҳаж сафарига жўнаб кетаётган зиёратчилар билан учрашди. Бу ҳақда «Дарё» мухбири Азизбек Абдувалиев хабар бермоқда.
Абдураззақов зиёратчилар билан мулоқот чоғида отаси муборак сафарга йўл олган пайтларни эслаб ўтди.
«Адашмасам, 1994 йили бўлса керак, отамизни зиёратга кузатганмиз. Аеропорт атрофи тўла одам, кимдир эшикка, яна кимдир панжарага осилган. Ҳозирги кузатиш маросимлари қандай чиройли, тартибли. Диний қўмита ва Ўзбекистон мусулмонлари идораси саъй-ҳаракатлари билан Саудиядаги шароитлар ҳам аъло даражада ташкилланган. Меҳмонхона, келди-кетди, логистика масалалари. Қисқаси, бу йил зиёратчилар учун яратилган шароитлар ҳар қачонгидан яхши. Сизларни муборак сафардан қайтишда ҳам шундай байрамона кутиб олиш насиб этсин», — деди Наманган ҳокими.
Шундан сўнг нуронийлар ва уламолар дуога қўл очиб, зиёратчилар эсон-омон Ҳаж сафарига бориб келишлари ният қилишди.
Маълумот учун, жорий йил 20 июнь кунининг ўзида Наманган халқаро аэропортидан Наманган —Мадина йўналишида 4 та авиарейс амалга оширилди. Уларда Наманган, Фарғона ва Андижондан жами 1000 нафарга яқин зиёратчилар Саудия Арабистонига йўл олди.
Изоҳ (0)