Ukraina Oliy Radasi media vositalari va jamoat joylarida Rossiya musiqasini taqiqlovchi qonunni qabul qildi, deb ma’lum qildi ukrainalik deputat Yaroslav Jeleznyak. Rada saytida nashr etilgan materialga ko‘ra, qonun qabul qilinishi uchun 303 nafar deputat ovoz bergan.
Qonun matnida aytilishicha, Ukrainada “agressiv” deb e’lon qilingan mamlakat fuqarosining ijodi asosidagi “fonogrammalar, videogrammalar va kliplar”ni omma oldida ijro etish va namoyish etish taqiqlanadi.
Bu talab 1991-yildan beri Rossiya fuqaroligiga ega bo‘lgan ijrochilarning qo‘shiqlariga taalluqlidir. Qoida Rossiya fuqaroligidan voz kechib, Ukraina fuqaroligini olganlarga taalluqli emas.
Bundan tashqari Rada Rossiya va Belarusdan, shuningdek, Ukrainaning bosib olingan hududlaridan kitob va boshqa nashriyot mahsulotlarini olib kirish va tarqatishni taqiqlovchi qonunni qabul qildi.
Mart oyida Vladimir Zelenskiy Rossiya propagandasini taqiqlovchi qonunni imzolagandi. Qonun Rossiyaning Ukrainaga qarshi qurolli tajovuzini oqlash, unga aloqador shaxslarni maqtashni taqiqlaydi. Rossiyaning harakatlarini oqlovchi partiyalar va rossiyaparast tashkilotlar faoliyati sud qarori bilan tugatilishi mumkin.
Izoh (0)