“PSJ” Kristof Galteni olib kelish uchun 10 mln yevro sarflaydi

“Nitssa” bosh murabbiyi Kristof Galte “PSJ”ni boshqarishga yaqin.

Parijliklar 55 yoshli mutaxassis uchun 10 million yevro tovon puli to‘lashga rozi, deya xabar beradi jurnalist Fabris Hokins. Galtening fransuz klubi bilan shartnomasida shunday band bor.

Galte “Nitssa”ni tark etsa, uning o‘rnini Lyusyen Favr egallaydi.

Avvalroq “PSJ” Zinedin Zidanni bosh murabbiylikka asosiy nomzod sifatida ko‘rayotgandi, ammo Zidan parijliklar taklifini rad etgani ma’lum bo‘lgandi.

Hozirda “Nitssa” bosh murabbiyi sifatida faoliyat olib borayotgan Kristof Galte “Marsel”, “Sent-Etyen” va “Lill”da ishlagan. 2020/21-yilgi mavsumda “Lill” bilan birgalikda Fransiya chempionligini qo‘lga kiritgan. “Nitssa” 2021/22-yilgi mavsumda Liga 1 ni 5-pog‘ona bilan yakunladi.

Ikki mavsumdan beri parijliklar klubini boshqarib kelayotgan Maurisio Pochettino “PSJ” bilan shartnomani to‘xtatishi xabar qilingandi.