O‘zbekistonda aholiga ko‘rsatilgan xizmatlar hajmi 15,8 foizga oshdi

O‘zbekistonda 2022-yilning yanvar—may oylarida aholiga ko‘rsatilgan bozor xizmatlari hajmi o‘tgan yilga nisbatan 15,8 foizga oshdi. Bu haqda Davlat statistika qo‘mitasi xabar berdi.

Hozirda bunday xizmatlar qiymati 24, 8 mlrd so‘mga oshib, 131,6 mlrd so‘mga yetgan. O‘tgan yilning mos davriga nisbatan bu ko‘rsatkich hajmi may oyida 4,8 trln so‘mga oshib 29,7 trln so‘mni tashkil etdi.

Ko‘rsatilgan bozor xizmatlari hajmining o‘sishidagi asosiy omil — moliyaviy xizmatlar 30,4 foizga, aloqa va axborotlashtirish xizmatlari 24,2 foizga, transport xizmatlari 14,6 foizga, savdo xizmatlari 8,6 foizga o‘sgani hisoblanadi.

2022- yilning yanvar—may oylarida moliyaviy xizmatlar sohasida yuqori o‘sishga erishildi (30,4 foiz), 2021-yilning shu davriga nisbatan o‘sish sur’ati bilan solishtirganda farq 2,2 punktni tashkil etdi.

Iqtisodiy faoliyat turlari bo‘yicha eng katta ulushni savdo xizmatlar egallaydi. O‘tgan 5 oyda bu xizmatlarning ulushi 25 foizni tashkil etdi.

Shu bilan birga, yuqori ko‘rsatkichlar moliyaviy xizmatlar (23 foiz), transport xizmatlari (22 foiz), aloqa va axborotlashtirish xizmatlari (6,4 foiz), shuningdek, ta’lim sohasidagi xizmatlar bo‘yicha (4,1 foiz) qayd etildi.

Kompyuterlarni ta’mirlash bo‘yicha xizmatlar hajmida biroz o‘sish qayd etilib, ularning ulushi 1,7 foizga yetdi.