Maktabgacha ta’lim vazirligi YXHTning O‘zbekistondagi loyihalari koordinatori ofisi hamda Axborot va pedagogika texnologiyalari innovatsion markazi bilan hamkorlikda “Yer — bizning umumiy uyimiz” nomli dastur ishlab chiqdi. Toshkent shahridagi “Yapon bog‘i”da ushbu dasturning taqdimoti bo‘lib o‘tdi, deya xabar bermoqda “Daryo” muxbiri.
Ta’kidlanishicha, “Yer — bizning umumiy uyimiz” dasturi ilg‘or xalqaro tajribalar, maktabgacha yoshdagi bolalarga ekologik ta’lim va tarbiya berish borasidagi tadqiqotlarni hisobga olgan holda ishlab chiqilgan.
“Shu kunga qadar “Ilk qadam” davlat o‘quv dasturiga asosan, bog‘chalardagi bolajonlarga “Atrofdagi olam bilan tanishtirish — eksperimentlar, amaliy tajriba”, “Tabiat bilan tanishtirish”, “Rasm chizish” darslarida atrof-muhit va uni asrashga doir mashg‘ulotlar o‘tkazilgan.
“Yer — bizning umumiy uyimiz” dasturida esa bolalarning bilim va tasavvurlari yanada kengayadi. Ushbu yangi dastur o‘zgaruvchanligi, moslashuvchanligi va individual rivojlanish xususiyatlaridan kelib chiqib, har bir bolaning ta’lim ehtiyojlariga qaratilgan.
Dasturni ishlab chiqish va joriy etishdan maqsad — bolalar hamda ularning ota-onalarida (qonuniy vakillarida) ekologik madaniyatni oshirish, ona zamin va tabiiy boyliklarga hurmat bilan munosabatda bo‘lishni rivojlantirish, atrof-muhitdan oqilona foydalanish ko‘nikma va malakasini, tabiatga ziyon yetkazuvchi harakatlarga nisbatan murosasiz munosabatni tarbiyalashdan iborat” — deydi Maktabgacha ta’lim vazirligi boshqarma boshlig‘i Ibrohim Ismatov.
Vazirlik rasmiysi OAV vakillariga bergan intervyusida ushbu dasturdagi yangiliklar haqida ma’lumot aytarkan, quyidagilarni ta’kidlab o‘tdi:
- maktabgacha yoshdagi bolalarni ekologik ta’lim va tarbiyalashning turli jihatlarini qamrab oladi;
- ekologiyaning ilmiy asoslangan to‘rtta qonuni keltirilgan;
- dastur bolalarning atrof-muhitga har tomonlama yordam ko‘rsatish ko‘nikmalarini ham rivojlantirishni qo‘llab- quvvatlaydi;
- uch yo‘nalish bo‘yicha tematik bloklar taqdim etilgan: jonsiz va jonli tabiat, insonning tabiat bilan o‘zaro munosabati va ekologik xavfsizlik;
- tabiatda va favqulodda vaziyatlarda xavfsiz xatti-harakatlar qoidalari jamlangan;
- ota-onalar va jamiyat bilan ishlash bo‘limi taqdim etilgan. Chunki bolaning hayotiy pozitsiyasi, xarakterining asoslari oilada shakllanadi.
“Tarbiyachilarning mazkur materiallardan foydalanishi natijasida bolalarga ekologik ta’lim va tarbiya berish samaradorligi oshadi”, deya qo‘shimcha qiladi u.
Izoh (0)