Мактабгача таълим вазирлиги ЕХҲТнинг Ўзбекистондаги лойиҳалари координатори офиси ҳамда Ахборот ва педагогика технологиялари инновацион маркази билан ҳамкорликда «Ер — бизнинг умумий уйимиз» номли дастур ишлаб чиқди. Тошкент шаҳридаги «Япон боғи»да ушбу дастурнинг тақдимоти бўлиб ўтди, дея хабар бермоқда «Дарё» мухбири.
Таъкидланишича, «Ер — бизнинг умумий уйимиз» дастури илғор халқаро тажрибалар, мактабгача ёшдаги болаларга экологик таълим ва тарбия бериш борасидаги тадқиқотларни ҳисобга олган ҳолда ишлаб чиқилган.
«Шу кунга қадар «Илк қадам» давлат ўқув дастурига асосан, боғчалардаги болажонларга «Атрофдаги олам билан таништириш — экспериментлар, амалий тажриба», «Табиат билан таништириш», «Расм чизиш» дарсларида атроф-муҳит ва уни асрашга доир машғулотлар ўтказилган.
«Ер — бизнинг умумий уйимиз» дастурида эса болаларнинг билим ва тасаввурлари янада кенгаяди. Ушбу янги дастур ўзгарувчанлиги, мослашувчанлиги ва индивидуал ривожланиш хусусиятларидан келиб чиқиб, ҳар бир боланинг таълим эҳтиёжларига қаратилган.
Дастурни ишлаб чиқиш ва жорий этишдан мақсад — болалар ҳамда уларнинг ота-оналарида (қонуний вакилларида) экологик маданиятни ошириш, она замин ва табиий бойликларга ҳурмат билан муносабатда бўлишни ривожлантириш, атроф-муҳитдан оқилона фойдаланиш кўникма ва малакасини, табиатга зиён етказувчи ҳаракатларга нисбатан муросасиз муносабатни тарбиялашдан иборат» — дейди Мактабгача таълим вазирлиги бошқарма бошлиғи Иброҳим Исматов.
Вазирлик расмийси ОАВ вакилларига берган интервьюсида ушбу дастурдаги янгиликлар ҳақида маълумот айтаркан, қуйидагиларни таъкидлаб ўтди:
- мактабгача ёшдаги болаларни экологик таълим ва тарбиялашнинг турли жиҳатларини қамраб олади;
- экологиянинг илмий асосланган тўртта қонуни келтирилган;
- дастур болаларнинг атроф-муҳитга ҳар томонлама ёрдам кўрсатиш кўникмаларини ҳам ривожлантиришни қўллаб- қувватлайди;
- уч йўналиш бўйича тематик блоклар тақдим этилган: жонсиз ва жонли табиат, инсоннинг табиат билан ўзаро муносабати ва экологик хавфсизлик;
- табиатда ва фавқулодда вазиятларда хавфсиз хатти-ҳаракатлар қоидалари жамланган;
- ота-оналар ва жамият билан ишлаш бўлими тақдим этилган. Чунки боланинг ҳаётий позицияси, характерининг асослари оилада шаклланади.
«Тарбиячиларнинг мазкур материаллардан фойдаланиши натижасида болаларга экологик таълим ва тарбия бериш самарадорлиги ошади», дея қўшимча қилади у.
Изоҳ (0)