O‘zbekiston Milliy gvardiyasining qisqa raqamli telefon tarmog‘i ishga tushdi

Milliy gvardiyaning hududiy boshqarmalari navbatchilik qismlarida 2022-yil 15-iyundan 1215 qisqa raqamli telefon tarmog‘i faoliyati tashkil etildi.

Milliy gvardiya qo‘mondonining buyrug‘ida belgilanganidek:

• qisqa raqamli telefon orqali — fuqarolarning, shuningdek, Milliy gvardiya bo‘linmalari shaxsiy tarkibi va ularning oila a’zolarining qo‘ng‘iroqlari qabul qilinadi, ro‘yxatga olinadi va har kuni soat 09:00ga qadar birinchi rahbarga ko‘rib chiqish uchun kiritiladi;
• hududiy boshqarmalar boshliqlari o‘z vakolati doirasida qisqa raqamli telefon orqali tushayotgan qo‘ng‘iroqlar masalasini qonunchilik hujjatlarida belgilangan tartibda ko‘rib chiqilishini va hal etilishini ta’minlaydilar.

Qo‘ng‘iroqlar butun O‘zbekiston Respublikasi barcha hududidan 1215 yagona raqam orqali qo‘ng‘iroq qilish yo‘li bilan bepul amalga oshiriladi.

Qisqa raqamli telefon navbatchilik qismlarida 24 soat mobaynida tun-u kun faoliyat olib boradi.

Qo‘ng‘iroqlarni qabul qilish davomiyligi 20 daqiqadan oshmasligi lozim, ushbu muddat tugagandan keyin qo‘ng‘iroq avtomatik tarzda aloqa tarmog‘idan uziladi.

Qisqa raqamli telefonga tushgan qo‘ng‘iroq bo‘yicha har kun ertalab soat 09:00 dan kechiktirmay Milliy gvardiya bo‘linmalari rahbarlariga (hududiy boshqarma boshlig‘iga) yozma axborot beriladi.