Ijtimoiy tarmoqlarda mashinalar “tonirovka”si 1-iyuldan bepul bo‘lishi haqida xabarlar tarqaldi. IIV YHXBBning “Daryo”ga ma’lum qilishicha, ularda bunday ma’lumot yo‘q va yaqin orada batafsil javob berishadi.
Ma’lumot uchun, hukumat qarori bilan 2018-yil 1-avgustdan boshlab, jismoniy va yuridik shaxslarga tusi o‘zgartirilgan (qoraytirilgan) oynali yengil avtotransport vositalaridan pulli asosda foydalanishga ruxsat berilgandi.
Ma’lumot uchun, orqa yon oynalarining tusini o‘zgartirishga (qoraytirishga) ruxsatnoma berish uchun to‘lov stavkalari jismoniy shaxslar uchun bazaviy hisoblash miqdorining 5 baravari — 1 mln 500 ming so‘mni tashkil qiladi.
Yuridik shaxslarga orqa yon oynani qoraytirish uchun to‘lov miqdori — BHMning 10 baravari — 3 mln so‘m.
Shuningdek, orqa va old yon oynalar bo‘yicha tusini o‘zgartirishning to‘lovi miqdori BHMning 50 baravari — 15 mln so‘mni tashkil etadi.
Ma’muriy javobgarlik to‘g‘risidagi kodeksning 126-moddasiga ko‘ra, avtomashinani ruxsatsiz “tonirovka” qilish bazaviy hisoblash miqdorining 25 baravari — 7,5 mln so’m miqdorida jarima solishga sabab bo‘ladi.
Xuddi shunday huquqbuzarlik ma’muriy jazo chorasi qo‘llanganidan keyin bir yil davomida takror sodir etilgan bo‘lsa, — bazaviy hisoblash miqdorining 40 baravari — 12 mln miqdorida jarima solishga sabab bo‘ladi.
Deputat Rasul Kusherbayevning yozishicha, orqa oynasiga #Tonirovka_jinoyat_emas degan xeshteg yopishtirgan haydovchilarni Buxoro viloyati IIBYHXBdan telefon qilib chaqirishmoqda.
Avvalroq “Mahalla” telekanalining “Minbar” ko‘rsatuvida Orifjon Nazarov ismli avtomaktab o‘qituvchisi “tonirovka”ning bolalar ruhiyatiga salbiy ta’sir qilishi mumkinligi haqida gapirgandi.
Advokat va avtobloger Kamoliddin Bahavadinov esa O‘zbekistonda “tonirovka” uchun belgilangan narxlar juda balandligini tanqid qilgan edi.
Shuningdek, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov ham “tonirovka”sini bepul qilish taklifi bilan chiqqandi. Uning aytishicha, kunlar tobora isib borayotgani sabab mashinalar oynasini qoraytirishni bepul qilib qo‘yish kerak.
Izoh (0)