Odessa, Xarkov va Xerson kabi Ukraina hududlarining kelajakdagi maqomi “mahalliy aholi xohishiga” bog‘liq bo‘ladi, dedi Rossiya prezidenti Vladimir Putinning matbuot kotibi Dmitriy Peskov CNN telekanaliga bergan intervyusida.
“Ukraina hududi va viloyatlariga kelsak, bilasizmi, bizning harbiylarimiz bu hududlarni millatchi bo‘linmalardan qanchalik tozalasa, shunchalik ko‘p odam ularni olqishlaydi va kelajakda Kiyevning amaldagi rejimi ostida yashashni to‘xtatish istagini bildiradi”, — dedi Peskov Sankt-Peterburgda CNN jurnalistining Ukraina hududlari taqdiri haqidagi savoliga javoban. CNN veb-saytida intervyudan parchalar e’lon qilindi.
Matbuot kotibi, shuningdek, Rossiyaning asosiy maqsadi Donbass aholisini “Donetskni o‘qqa tutganlar”dan himoya qilish ekanini va Rossiya buni oxirgi 8-9 yil davomida amalga oshirib kelayotganini ta’kidladi.
Peskov Rossiya G‘arbning iqtisodiy sanksiyalariga qarshilik ko‘rsatishini qo‘shimcha qildi. Uning so‘zlariga ko‘ra, G‘arb sanksiyalar qo‘llashda kutilgan samaraga erishmadi.
Peskov Finlyandiya va Shvetsiyaning NATOga a’zo bo‘lish niyatiga ham to‘xtaldi. Uning ta’kidlashicha, Rossiya bu mamlakatlarga tahdid solmaydi.
“Biz Finlyandiya va Shvetsiyaning NATOga a’zo bo‘lishi Yevropa qit’asi xavfsizligiga qo‘shimcha foyda keltirmasligiga ishonchimiz komil. Aksincha, bu qo‘shimcha keskinlikni keltirib chiqaradi”, — dedi u.
21-fevral kuni Rossiya prezidenti Vladimir Putin Donetsk va Lugansk xalq respublikalarining mustaqilligini tan olish haqidagi farmonni imzolagan edi. 24-fevral kuni u Ukrainada “maxsus harbiy operatsiya” boshlanganini e’lon qildi.
Hozirda Xerson viloyati to‘liq, Zaporojye esa qisman Rossiya kuchlari nazorati ostida. Iyun oyida Ukrainaning Xerson viloyatida Rossiyaga qo‘shilish ehtimoli masalasini hal qilish uchun referendum o‘tkazilishi xabar qilingan edi. Shuningdek, Rossiya nazoratidagi Zaporojye viloyatining Melitopol shahrida ham referendumga tayyorgarlik boshlangan.
Izoh (0)