Одесса, Харьков ва Херсон каби Украина ҳудудларининг келажакдаги мақоми «маҳаллий аҳоли хоҳишига» боғлиқ бўлади, деди Россия президенти Владимир Путиннинг матбуот котиби Дмитрий Песков CNN телеканалига берган интервьюсида.
«Украина ҳудуди ва вилоятларига келсак, биласизми, бизнинг ҳарбийларимиз бу ҳудудларни миллатчи бўлинмалардан қанчалик тозаласа, шунчалик кўп одам уларни олқишлайди ва келажакда Киевнинг амалдаги режими остида яшашни тўхтатиш истагини билдиради», — деди Песков Санкт-Петербургда CNN журналистининг Украина ҳудудлари тақдири ҳақидаги саволига жавобан. CNN веб-сайтида интервьюдан парчалар эълон қилинди.
Матбуот котиби, шунингдек, Россиянинг асосий мақсади Донбасс аҳолисини «Донецкни ўққа тутганлар»дан ҳимоя қилиш эканини ва Россия буни охирги 8-9 йил давомида амалга ошириб келаётганини таъкидлади.
Песков Россия Ғарбнинг иқтисодий санкцияларига қаршилик кўрсатишини қўшимча қилди. Унинг сўзларига кўра, Ғарб санкциялар қўллашда кутилган самарага эришмади.
Песков Финляндия ва Швециянинг НАТОга аъзо бўлиш ниятига ҳам тўхталди. Унинг таъкидлашича, Россия бу мамлакатларга таҳдид солмайди.
«Биз Финляндия ва Швециянинг НАТОга аъзо бўлиши Европа қитъаси хавфсизлигига қўшимча фойда келтирмаслигига ишончимиз комил. Аксинча, бу қўшимча кескинликни келтириб чиқаради», — деди у.
21 февраль куни Россия президенти Владимир Путин Донецк ва Луганск халқ республикаларининг мустақиллигини тан олиш ҳақидаги фармонни имзолаган эди. 24 февраль куни у Украинада «махсус ҳарбий операция» бошланганини эълон қилди.
Ҳозирда Херсон вилояти тўлиқ, Запорожье эса қисман Россия кучлари назорати остида. Июнь ойида Украинанинг Херсон вилоятида Россияга қўшилиш эҳтимоли масаласини ҳал қилиш учун референдум ўтказилиши хабар қилинган эди. Шунингдек, Россия назоратидаги Запорожье вилоятининг Мелитопол шаҳрида ҳам референдумга тайёргарлик бошланган.
Изоҳ (0)