Fransiya prezidenti Emmanuel Makron rossiyalik hamkasbi Vladimir Putin tomonidan muayyan harakatlar amalga oshirilgan taqdirdagina Rossiya tashrif buyurishini ma’lum qildi, deb yozadi “RBK”. Bu haqda u TF1 telekanaliga bergan intervyusida aytib o‘tdi.
“Ukrainaga tashrifdan keyingi qadam Rossiyaga safar bo‘ladimi?” — degan savolga Makron shunday javob berdi: “Bu dastlabki shartlarni, prezident Putin tomonidan ma’lum bir harakatlarni ko‘zda tutadi”.
Fransiya yetakchisi Germaniya kansleri Olaf Shols, Italiya bosh vaziri Mario Dragi va Ruminiya prezidenti Klaus Yoxannis bilan birga 16-iyun, payshanba kuni Kiyevga tashrif buyurgandi.
Ukraina prezidenti Vladimir Zelenskiy bilan munosabatlari haqida gapirar ekan, Fransiya yetakchisi ular “sovimagan”ini aytdi. Uning so‘zlariga ko‘ra, agar u Putin bilan aloqalarni saqlab turgan bo‘lsa ham, bu muloqotlar ukrainalik hamkasbidan yashriincha bo‘lmagan va “ba’zan hatto uning iltimosiga ko‘ra bo‘lgan”.
So‘nggi marta Makron Rossiyaga 7-fevral kuni kelgan edi. Rossiyalik hamkasbi bilan muzokaralardan keyin Fransiya prezidenti, xususan, ularning uchrashuvi Ukraina atrofidagi vaziyatning yanada kuchayishi oldini olishda yordam berganini aytgandi. “Maqsadga erishildi”, — degandi u o‘shanda.
Ukrainada Rossiya harbiy operatsiyasi boshlanganidan keyin Putin va Makron bir necha marta telefon orqali suhbatlashdi. Chunonchi, yetakchilar 24-fevral, harbiy harakatlar boshlangan kuni gaplashgan, mart oyida esa deyarli har hafta qo‘ng‘iroqlashgan. May oyida ikki marta muloqot o‘tkazilgan, oxirgisi 28-sanada bo‘lgan.
Iyun oyi boshida Fransiya prezidenti 2021-yil dekabridan buyon Putin bilan “suhbatlar hisobini unutib qo‘ygani”ni, u bilan “yuzlab soat” gaplashganini aytdi. Makron G‘arbni “o‘z xalqi, o‘zi va tarix uchun tarixiy va jiddiy xatolik”ka yo‘l qo‘ygan Rossiyani yerga urmaslikka chaqirgandi, uning so‘zlariga ko‘ra, bu haqda u rossiyalik hamkasbiga gapirgan.
Izoh (0)