Amerika rasmiylari Vashington tomonidan Kiyevga yordam uchun ajratilgan mablag‘lar ustidan zaruriy nazorat o‘rnatilmasa, ularning talon-toroj qilinishi mumkinligidan xavotir bildirdi. Bu haqda The Wall Street Journal (WSJ) xabar berdi. Nashrning qayd etishicha, AQSH rasmiylari Afg‘onistonda ham xuddi shunday noto‘g‘ri hisob-kitobga yo‘l qo‘ygan va hozir oqibatlari haqida o‘ylamasdan yana katta miqdorda mablag‘ sarflashda davom etmoqda.
Hozirgacha G‘arb tomonidan ko‘rsatilgan yordamdan noqonuniy foydalanish holatlari qayd etilmagan. Biroq, ajratilgan yordam miqdori va uning taqsimlanishi qat’iy nazorat qilinmayotgani hisobga olinsa, muammolar, ehtimol, vaqt masalasidir, deb ta’kidlaydi nashr. “Yordamning juda katta ko‘lamda ekanini hamda Ukrainada AQSH va NATO nazorat organlari yo‘qligini inobatga olgan holda, AQSHning avvalgi harbiy kampaniyalari faxriylari muammolar paydo bo‘lishi vaqt masalasi ekanini aytmoqda”, — deyiladi maqolada.
Pentagonning sobiq rasmiysi Mark Kensian Amerika hukumatining Ukraina uchun ajratgan mablag‘lari o‘zlashtirilishi mumkin, deb hisoblamoqda. “Kiyev mojaro avj olishidan oldin ham korrupsiya uchun tanqid qilingan va bu muammo keyin ham hech qayerga yo‘qolmagan”, — deya tushuntirdi Kensian.
O‘z navbatida, AQSH hukumatining Afg‘onistonni qayta tiklash bo‘yicha bosh inspektori, bir necha yillardan beri AQSHning Afg‘onistonga yordam ko‘rsatish jarayonida yo‘l qo‘yilgan qonunbuzarliklarni aniqlash bilan shug‘ullanib kelayotgan Jon Sopko o‘g‘irlikni muqarrar deb bilishini aytdi.
“Maqsad ezgu bo‘lsa ham, o‘g‘irlik sodir bo‘ladi. Qonunbuzarliklar bo‘ladi. Nepotizm bo‘ladi. Ahmoqona qarorlar qabul qilinadi. Inson tabiati shunday. Bir-ikki yil ichida biz isrofgarchilik, o‘g‘irlik va suiiste’mollik haqidagi yangiliklarni o‘qiymiz hali”, – deya qo‘shimcha qildi Jon Sopko.
May oyida AQSH Senati Ukrainaga rekord darajadagi 40 milliard dollar yordam ko‘rsatishni ma’qulladi. AQSH Davlat kotibi Entoni Blinken Ukrainaga yangi harbiy yordam paketining qiymati 100 million dollar bo‘lishini ma’lum qildi.
AQSH Davlat kotibining Yevropa va Yevrosiyo masalalari bo‘yicha yordamchisining birinchi o‘rinbosari Derek Xogan AQSH Ukraina hukumatiga oyiga 1,5 milliard dollar jo‘natishni rejalashtirayotganini ma’lum qildi. Uning so‘zlariga ko‘ra, Vashington 4—5 oyga davomida shunday yordamni taqdim etadi.
Izoh (0)