To‘qayev: “Rossiyadagi ba’zi odamlar bu vaziyatni noto‘g‘ri talqin qilib, Rossiya Qozog‘istonni qutqarib qoldi, endi Qozog‘iston Rossiyaning xizmatida bo‘lishi va oyoqlariga ta’zim qilishi kerakligini da’vo qilmoqda”

Qozog‘iston prezidenti Qosim-Jo‘mart To‘qayev yanvar oyidagi voqealari chog‘ida Rossiya Qozog‘istonni “qutqarib qolgani” haqidagi iddaolarga javob berdi, deya yozadi Tengrinews nashri.

“Rossiyadagi ba’zi odamlar bu vaziyatni noto‘g‘ri talqin qilib, Rossiya Qozog‘istonni “qutqarib qoldi” va Qozog‘iston endi abadiy Rossiyaga “xizmat qilishi va oyoqlariga ta’zim qilishi” kerakligini da’vo qilmoqda. Menimcha, bular mutlaqo asossiz, haqiqatdan yiroq fikrlar”, — dedi Qosim-Jo‘mart To‘qayev “Rossiya 24” telekanali jurnalisti Andrey Kondrashovga bergan intervyusida.

Qozog‘iston rahbari ODKB (Kollektiv xavfsizlik shartnomasi tashkiloti. Ushbu tashkilotda Rossiya yetakchi rol o‘ynaydi) kontingentining harbiy harakatlarda qatnashmasligi haqida boshidanoq kelishuv bo‘lganini ta’kidladi.

“Darhaqiqat, ODKB cheklangan kontingenti tomonidan birorta ham o‘q uzilgani yo‘q va ular bu yerda 10 kundan ortiq bo‘lmagan”, — dedi Qozog‘iston prezidenti.

Prezident To‘qayev mamlakatdagi tartibsizliklar fonida 6-yanvar kuni ODKB davlatlari rahbarlaridan terrorchilik tahdidini bartaraf etishda Qozog‘istonga yordam ko‘rsatishni so‘rab murojaat qilgandi. ODKB tinchlikparvar kuchlari strategik obyektlarni himoya qilish bilan shug‘ullangan.