British Airways aviakompaniyasining Londondan Vashingtonga uchayotgan samolyotida suv toshib ketdi, suv yuqori palubadan pastkisiga oqib tusha boshladi, deb yozadi TJournal.

Yetti soatlik transatlantika parvozi chog‘ida ikki qavatli Airbus A380 samolyotida sharillab suv oqa boshladi. British Airways tasdiqlashicha, unda suv uchun rezervuar bilan bog‘liq muammolar yuzaga kelgan, oqibatda samolyotning orqa qismidagi, ekonom-klass yo‘lovchilari foydalanadigan zinapoya suv ostida qolgan. Bort jami 500 yo‘lovchini sig‘dira oladi.

Ekipaj a’zolari 9 ming metr balandlikda suv oqimini to‘xtatishga uringan: ular suv toshgan joylarga sochiq va ko‘rpalar tashlagan. Yo‘lovchilar zudlik bilan quruq joylarga olib o‘tilgan.

Voqea jiddiy oqibatlarga olib kelmadi, texnik nosozlik parvozning oxirrog‘ida yuz bergandi. Samolyot shu kuniyoq yana boshqa reys uchun havoga ko‘tarilgan.

“Xavfsizlik bilan bog‘liq hech qanday muammolar mutlaqo yuz bergani yo‘q, bu toza ichimlik suvi uzatilishi bilan bog‘liq edi. Nosoz klapan almashtirildi va muammo hal qilindi. Parvoz muvaffaqiyatli davom etdi va samolyot odatdagidek qo‘ndi”, — deya bayonot berdi British Airways.