Daniya va Kanada Gans oroliga egalik qilish bo‘yicha hududiy bahsni hal qilish to‘g‘risidagi kelishuvni imzoladi. Ziddiyat 1973-yildan beri davom etayotgan edi. Bu haqda Daniya tashqi ishlar vazirligi matbuot xizmati xabar berdi.
“Kennedi bo‘g‘ozidagi Gans oroli Kanadaning Nunavut hududi hamda Daniya tarkibidagi avtonom hudud hisoblangan Grenlandiya o‘rtasida bo‘linadi”, — deyiladi TIV bayonotida.
Gans orolini bo‘lish to‘g‘risidagi kelishuvga Ottavada Daniya va Kanada tashqi ishlar vazirlari, shuningdek, Grenlandiya bosh vaziri imzo chekkan. Endi Daniya va Kanada quruqlik chegarasiga ega bo‘ladi, ularning dengiz chegarasi ham kengayadi.
Kimsasiz Gans orolining maydoni 1,3 kvadrat kilometrni tashkil qiladi. Mamlakatlar o‘rtasidagi kelishmovchilik 1973-yilda, Daniya va Kanada dengiz chegarasi bo‘yicha muzokaralar olib borayotgan paytda boshlangan. O‘shanda orolning maqomi haqidagi qaror keyinga qoldirilgan. Bahs davomida Daniya harbiylari orolga tashrif buyurganlarida u yerda bir shisha Daniya akvavitini, kanadalik harbiylar esa bir shisha Kanada viskisini qoldirib ketgan.
Izoh (0)