Қозоғистон президенти Қосим-Жўмарт Тўқаев январь ойидаги воқеалари чоғида Россия Қозоғистонни «қутқариб қолгани» ҳақидаги иддаоларга жавоб берди, дея ёзади Tengrinews нашри.
«Россиядаги баъзи одамлар бу вазиятни нотўғри талқин қилиб, Россия Қозоғистонни «қутқариб қолди» ва Қозоғистон энди абадий Россияга «хизмат қилиши ва оёқларига таъзим қилиши» кераклигини даъво қилмоқда. Менимча, булар мутлақо асоссиз, ҳақиқатдан йироқ фикрлар», — деди Қосим-Жўмарт Тўқаев «Россия 24» телеканали журналисти Андрей Кондрашовга берган интервьюсида.
Қозоғистон раҳбари ОДКБ (Коллектив хавфсизлик шартномаси ташкилоти. Ушбу ташкилотда Россия етакчи рол ўйнайди) контингентининг ҳарбий ҳаракатларда қатнашмаслиги ҳақида бошиданоқ келишув бўлганини таъкидлади.
«Дарҳақиқат, ОДКБ чекланган контингенти томонидан бирорта ҳам ўқ узилгани йўқ ва улар бу ерда 10 кундан ортиқ бўлмаган», — деди Қозоғистон президенти.
Президент Тўқаев мамлакатдаги тартибсизликлар фонида 6 январь куни ОДКБ давлатлари раҳбарларидан террорчилик таҳдидини бартараф этишда Қозоғистонга ёрдам кўрсатишни сўраб мурожаат қилганди. ОДКБ тинчликпарвар кучлари стратегик объектларни ҳимоя қилиш билан шуғулланган.
Изоҳ (0)