Dunyoda sodir bo‘layotgan yurakni ezadigan voqealar tufayli odamlar yangiliklar bilan qiziqmay qo‘ydi, deb yozadi BBC News Britaniyaning Reuters Institute tadqiqot guruhiga tayanib.
46 ta mamlakatda 93 ming ishtirokchi o‘rtasida o‘tkazilgan so‘rov natijalariga ko‘ra, yangiliklarni o‘qishdan faol voz kechayotganlar ulushi 2017-yildagi 29 foizdan 38 foizgacha ko‘paygan.
Ba’zi mamlakatlarda, shu jumladan, Braziliya (54%) va Buyuk Britaniyada (46%) ushbu ko‘rsatkich ikki marta oshgan.
Xususan, yoshlar fikricha, yangiliklar ularni xafa qiladi, ammo qiziqish pasayishining asosiy sababi ularning tez-tez takrorlanishidadir.
“Men o‘zimda xavotir uyg‘otadigan va kun davomidagi kayfiyatimga yomon ta’sir qiladigan narsalardan uzoq yurishga harakat qilaman, — dedi so‘rov ishtirokchilaridan biri, 27 yoshli britaniyalik yigit. — O‘limlar va halokatlar haqidagi yangiliklarni o‘qimaslikka intilaman”.
Boshqalarning aytishicha, yangiliklar bahslarni keltirib chiqaradi, ular esa bahslarga aralashishni istamaydi. Ayrimlarda esa yangiliklar ojizlik hissini uyg‘otadi, ko‘pchilik yoshlar esa yangiliklarni tushunishga qiynalishini aytib shikoyat qilgan.
Tadqiqotning yetakchi muallifi Nik Nyumanning aytishicha, olingan natijalar “yangiliklar sanoati uchun ayniqsa ko‘ngilsizdir”. “Jurnalistlar eng muhim deb hisoblaydigan siyosiy inqirozlar, xalqaro ziddiyatlar va global pandemiyalar kabilar aynan ba’zi odamlarning ixlosini qaytaradigan mavzulardir”, — deya aniqlik kiritdi u.
Tadqiqot o‘tkazilgan mamlakatlarning yarmida OAVga ishonch pasaygan bo‘lsa, bor-yo‘g‘i yettitasida oshgan. Umumiy hisobda ishonch darajasi 42 foizni tashkil qildi.
AQSHda ishonchning eng past darajasi qayd etildi — 26%, bu Slovakiyadagi ko‘rsatkich bilan tengdir.
Muammoni chuqurlashtirayotgan narsa shuki, yoshlar an’anaviy OAVlardan tobora ko‘proq uzoqlashib bormoqda: 18 yoshdan 24 yoshgacha bo‘lgan respondentlarning 15 foizi yangiliklarning asosiy manbai sifatida TikTok’dan foydalanishini ma’lum qilgan.
Izoh (0)