AQSH prezidenti Jo Bayden o‘zidan avvalgi davlat rahbari Donald Tramp Xitoydan keltiriladigan mahsulotlarga kiritgan savdo bojlarining bir qismini bekor qilish imkoniyatini ko‘rib chiqmoqda. Bu haqda The New York Times o‘z manbalariga tayanib xabar berdi, deb yozadi “RBK”.
Xitoyga qarshi cheklovlarni kamaytirishni biznes-birlashmalar, xususan, Savdo palatasi talab qilib turib olgan. Davlat rahbari ma’muriyatidagi ba’zi iqtisodiyotchilar fikricha, bunday qadam may oyida 8,6 foizga yetgan inflyatsiyani biroz (0,25 foizga) pasaytirish imkonini beradi. AQSH sobiq moliya vaziri, iqtisodiyotchi Lourens Sammers oqilona darajada zaiflashtirish (cheklovlarni) iste’molchilar narxlari indeksini 1,3 foizga tushiradi, degan fikrda. Agar Xitoy tovarlarini sotadigan kompaniyalar bojlar bekor qilinganidan keyin narxlarni pasaytirsagina bu yuz beradi, deya qayd etadi nashr. Amerika moliya vazirligining amaldagi rahbari Janet Yellen “gap inflyatsiya haqida borayotganida, tarif siyosati panatseya bo‘lishi”ga ishonmaydi, ammo ayrim bojlarning bekor qilinishi asosli bo‘ladi, deb hisoblaydi.
Axios ma’lumotlariga ko‘ra, Oq uy iste’molchilar tariflaridan bojlarni olib tashlashni muhokama qilmoqda, sanoat tovarlariga tariflarni bekor qilish masalasini esa nashr ehtimoldan yiroq deb atamoqda. Qaror shu oydayoq e’lon qilinishi mumkin.
Bayden may oyida Vashington Tramp tomonidan kiritilgan bojlar bilan qanday ish tutish haqida o‘ylayotganini aytgandi. Oq uyning o‘sha paytdagi vakili Jen Psaki Amerika ma’muriyati tariflarni ularning AQSHdagi kompaniyalarga ta’siri nuqtai nazaridan ko‘rib chiqayotganini ma’lum qilgandi: ba’zi bojlar, amaldagi ma’muriyat fikricha, nokonstruktiv bo‘lgan va ziyon keltirgan.
2018-yilda Tramp Pekinni “insofsiz savdo usullari”da va Amerika texnologiyalarini o‘g‘irlashda ayblab, jami 50 milliad dollarlik Xitoy tovarlariga 25 foiz miqdorida bojlar kiritgan edi. Keyinchalik Vashington qo‘shimcha tariflar joriy qildi. XXR AQSHdan keladigan tovarlarga javob cheklovlarini qo‘ydi. Shundan keyin mamlakatlar bir necha marta bojlar bo‘yicha istisnolar haqida kelishuvlar olib borgan.
2020-yilda Vashington va Pekin savdo bitimini tuzdi. Uning birinchi bosqichi shartlariga ko‘ra, Xitoy ikki yil ichida AQSHdan 200 milliard dollarlik qishloq xo‘jalik mahsulotlarini va boshqa tovarlarni sotib olishi kerak edi, shundan so‘ng Amerika ma’muriyati kiritilgan bojlarni bekor qilishga rozi bo‘lgan bo‘lardi. Biroq bitimning ikkinchi bosqichi haqida tomonlar haligacha kelishib olgani yo‘q.
May oyida AQSHda inflyatsiya 1981-yildan buyon rekord darajaga — 8,6 foizga yetdi. Eng ko‘p benzin va oziq-ovqat mahsulotlari qimmatlashmoqda.
Izoh (0)