Sun’iy yo‘ldoshdan olingan tasvirlar Eron koinotga raketalar uchirishga tayyorlanayotgani ehtimolini ko‘rsatmoqda. Bu haqda Associated Press Maxar Technologies ma’lumotlariga tayanib xabar berdi.
Maxar Technologies tasvirlarida Eronning Simnon viloyatidagi Imom Xumayniy kosmodromi aks etgan.
Agentlik xabariga ko‘ra, tasvirlardan birida raketa start maydoniga olib kelinayotganini ko‘rish mumkin. Keyinroq olingan tasvirda esa raketa maydonga o‘rnatilgan holatda turibdi.
Eron tomoni kosmodromdan raketa uchirilishiga oid rejalar haqida bayonot bergani yo‘q.
Ayni vaqtda, Eronning IRNA agentligi may oyida Eron, ehtimol, Fors taqvimi bo‘yicha yil oxirigacha (2023-yil mart) yettita sun’iy yo‘ldoshni uchirishga tayyorlab qo‘yishi haqida xabar bergandi.
Avvalroq Rossiya va Eron prezidentlari Vladimir Putin hamda Ibrohim Raisiy telefon orqali muloqot qilib, Eronning yadroviy kelishuvi bo‘yicha “yakuniy qarorga”ga kelishida erishilgan yutuqlarni muhokama qilgan edi.
Izoh (0)