АҚШ президенти Жо Байден ўзидан аввалги давлат раҳбари Дональд Трамп Хитойдан келтириладиган маҳсулотларга киритган савдо божларининг бир қисмини бекор қилиш имкониятини кўриб чиқмоқда. Бу ҳақда The New York Times ўз манбаларига таяниб хабар берди, деб ёзади «РБК».
Хитойга қарши чекловларни камайтиришни бизнес-бирлашмалар, хусусан, Савдо палатаси талаб қилиб туриб олган. Давлат раҳбари маъмуриятидаги баъзи иқтисодиётчилар фикрича, бундай қадам май ойида 8,6 фоизга етган инфляцияни бироз (0,25 фоизга) пасайтириш имконини беради. АҚШ собиқ молия вазири, иқтисодиётчи Лоуренс Саммерс оқилона даражада заифлаштириш (чекловларни) истеъмолчилар нархлари индексини 1,3 фоизга туширади, деган фикрда. Агар Хитой товарларини сотадиган компаниялар божлар бекор қилинганидан кейин нархларни пасайтирсагина бу юз беради, дея қайд этади нашр. Америка молия вазирлигининг амалдаги раҳбари Жанет Йеллен «гап инфляция ҳақида бораётганида, тариф сиёсати панацея бўлиши»га ишонмайди, аммо айрим божларнинг бекор қилиниши асосли бўлади, деб ҳисоблайди.
Axios маълумотларига кўра, Оқ уй истеъмолчилар тарифларидан божларни олиб ташлашни муҳокама қилмоқда, саноат товарларига тарифларни бекор қилиш масаласини эса нашр эҳтимолдан йироқ деб атамоқда. Қарор шу ойдаёқ эълон қилиниши мумкин.
Байден май ойида Вашингтон Трамп томонидан киритилган божлар билан қандай иш тутиш ҳақида ўйлаётганини айтганди. Оқ уйнинг ўша пайтдаги вакили Жен Псаки Америка маъмурияти тарифларни уларнинг АҚШдаги компанияларга таъсири нуқтаи назаридан кўриб чиқаётганини маълум қилганди: баъзи божлар, амалдаги маъмурият фикрича, ноконструктив бўлган ва зиён келтирган.
2018 йилда Трамп Пекинни «инсофсиз савдо усуллари»да ва Америка технологияларини ўғирлашда айблаб, жами 50 миллиад долларлик Хитой товарларига 25 фоиз миқдорида божлар киритган эди. Кейинчалик Вашингтон қўшимча тарифлар жорий қилди. ХХР АҚШдан келадиган товарларга жавоб чекловларини қўйди. Шундан кейин мамлакатлар бир неча марта божлар бўйича истиснолар ҳақида келишувлар олиб борган.
2020 йилда Вашингтон ва Пекин савдо битимини тузди. Унинг биринчи босқичи шартларига кўра, Хитой икки йил ичида АҚШдан 200 миллиард долларлик қишлоқ хўжалик маҳсулотларини ва бошқа товарларни сотиб олиши керак эди, шундан сўнг Америка маъмурияти киритилган божларни бекор қилишга рози бўлган бўларди. Бироқ битимнинг иккинчи босқичи ҳақида томонлар ҳалигача келишиб олгани йўқ.
Май ойида АҚШда инфляция 1981 йилдан буён рекорд даражага — 8,6 фоизга етди. Энг кўп бензин ва озиқ-овқат маҳсулотлари қимматлашмоқда.
Изоҳ (0)