Қашқадарёда камерадош аёлни 25,5 млн сўмга туширган шахс ушланди

Қашқадарё вилояти Қарши шаҳрида қамоқдаги шеригини алдаб, пулларини қўлга киритган шахс ушланди. Бу ҳақда Тергов департаменти хабар қилди.

Қайд этилишича, Б.Й. исмли аёл (43 ёшли) туман ИИБ бошлиғи номига ариза билан мурожаат қилган. Унда 2021 йил июнь ойида у тергов ҳибсхонасида Э.С. (45 ёшли) билан бирга судга қадар бир камерада сақланган вақтида танишиб қолганини айтган. Э.С. аёлга Жиноят кодекснинг 168-моддаси 2-қисми «а» банди (фирибгарлик) билан судланаётгани ва етказилган моддий зарарни қоплаб берсагина, қамоқдан чиқиб кета олишини айтган. Агар унга ёрдам берса, уни ҳам танишлари орқали қамоқдан чиқариб олишини билдириб. Б.Й.дан қизи орқали 18 миллион сўм моддий зарар учун пул олиб, қамоқдан чиқиб кетган.

Шундан сўнг, Б.Й.нинг қизи олдига бориб, онасининг ишларини ҳал қилиш учун деб, жами 7,5 миллион сўм пулни алдов йўли билан қўлга киритган. Берган ваъдасини бажармай, олган пулларини қайтариб бермаган. Фуқаро ундан пулларини ундиришни ва унга нисбатан қонуний чора кўрилишини сўраган.

Ҳолат юзасидан Жиноят кодекснинг 168-моддаси 3-қисми «б» банди (фирибгарлик) билан жиноий иш қўзғатилган. Ҳозирда тергов давом этмоқда.