Senatning 27-yalpi majlisida Oliy sud raisini saylash to‘g‘risidagi masala ko‘rib chiqildi. Bu haqda “Daryo” muxbiri xabar bermoqda.
Majlisda prezident Shavkat Mirziyoyev tomonidan Kozimjon Komilovni Oliy sudi raisi lavozimiga saylash uchun Senatga taqdimnoma kiritilgani aytildi. Senatorlar Kozimjon Komilovga bir qator savollar bilan murojaat qildi. Savollardan biri Oliy sud raisi sifatida kelajakdagi rejalari so‘raldi.
Bunga javoban, Kozimjon Komilov bajarilishi kutilayotgan bir nechta vazifalarni aytdi.
“Ko‘p mamlakatlarda sudlar yopiq. Ulardan ma’lumot olish, sudlar bilan uchrashish murakaab masala. Biz bu yo‘lni tanlamadik. Sudlar xalq uchun xizmat qilishi kerak degan tamoyil asosida ish olib borildi. Kelajak rejalarimiz haqida gapirsam. Odamlar sudga ishona boshladi. 2019-yildan boshlab sudlarga ariza shikoyatlar kelish soni oshdi. Odamlar muammolarini sud jarayoni orqali hal qilishini to‘liq ta’minlash kerak. Yangi sud korpusini shakllantirish lozim. Sudyalar oliy kengashi va oliy maktabini o‘zgartirish zarur. Ya’ni 70 foiz amaliyot, 30 foiz nazariyaga olib kelish kerak. 17-18 yil davomida Oliy sud eshiklari yopiq bo‘lgan. Shuncha yil davomida tanlab-tanlab 4 mingta ish ko‘rilgan.
Ma’lumot uchun, 2021-yilning o‘zida 7000 ta jinoyat ishi ko‘rildi. Albatta, muammolar bor va biz ular ustida ishlayapmiz. Yana muhim masala, “Adolat” axborot tizimi yaratiladi. Sud tizimida inson omili 70 foizga kamgan. Odamlarga uydan turib sudga murojaat qilish imkoniyati yaratiladi”, – dedi u.
Majlisda Senatning Sud-huquq masalalari qo‘mitasi tomonidan Kozimjon Komilov faoliyati o‘rganib chiqilgani aytildi. Ma’lum qilinishicha, Kozimjon Komilov tajribali yurist bo‘lib, uzoq yillar davomida adliya, sud tizimlarida rahbarlik qilib kelgan. 2017-yildan beri Oliy sud raisi lavozimida faoliyat yurmoqda. Senatorlar Kozimjon Komilov nomzodini Oliy sud raisligiga ma’qulladi.
Izoh (0)