Сенатнинг 27-ялпи мажлисида Олий суд раисини сайлаш тўғрисидаги масала кўриб чиқилди. Бу ҳақда «Дарё» мухбири хабар бермоқда.
Мажлисда президент Шавкат Мирзиёев томонидан Козимжон Комиловни Олий суди раиси лавозимига сайлаш учун Сенатга тақдимнома киритилгани айтилди. Сенаторлар Козимжон Комиловга бир қатор саволлар билан мурожаат қилди. Саволлардан бири Олий суд раиси сифатида келажакдаги режалари сўралди.
Бунга жавобан, Козимжон Комилов бажарилиши кутилаётган бир нечта вазифаларни айтди.
«Кўп мамлакатларда судлар ёпиқ. Улардан маълумот олиш, судлар билан учрашиш муракааб масала. Биз бу йўлни танламадик. Судлар халқ учун хизмат қилиши керак деган тамойил асосида иш олиб борилди. Келажак режаларимиз ҳақида гапирсам. Одамлар судга ишона бошлади. 2019 йилдан бошлаб судларга ариза шикоятлар келиш сони ошди. Одамлар муаммоларини суд жараёни орқали ҳал қилишини тўлиқ таъминлаш керак. Янги суд корпусини шакллантириш лозим. Судьялар олий кенгаши ва олий мактабини ўзгартириш зарур. Яъни 70 фоиз амалиёт, 30 фоиз назарияга олиб келиш керак. 17-18 йил давомида Олий суд эшиклари ёпиқ бўлган. Шунча йил давомида танлаб-танлаб 4 мингта иш кўрилган.
Маълумот учун, 2021 йилнинг ўзида 7000 та жиноят иши кўрилди. Албатта, муаммолар бор ва биз улар устида ишлаяпмиз. Яна муҳим масала, «Адолат» ахборот тизими яратилади. Суд тизимида инсон омили 70 фоизга камган. Одамларга уйдан туриб судга мурожаат қилиш имконияти яратилади», – деди у.
Мажлисда Сенатнинг Суд-ҳуқуқ масалалари қўмитаси томонидан Козимжон Комилов фаолияти ўрганиб чиқилгани айтилди. Маълум қилинишича, Козимжон Комилов тажрибали юрист бўлиб, узоқ йиллар давомида адлия, суд тизимларида раҳбарлик қилиб келган. 2017 йилдан бери Олий суд раиси лавозимида фаолият юрмоқда. Сенаторлар Козимжон Комилов номзодини Олий суд раислигига маъқуллади.
Изоҳ (0)