Qozog‘istonning Atirau shahridagi Aholiga xizmat ko‘rsatish markaziga mingga yaqin O‘zbekiston fuqarolari yog‘ilib keldi, deb yozadi “Orda.kz”. Ular uchun Rossiya Federatsiyasi bilan chegara yopiq bo‘lgani sababli, ular Qozog‘istonda vaqtinchalik ishlash uchun ruxsatnoma olmoqchi bo‘lyapti.
Ular o‘z pasportlarini yangilagani tufayli, vaqtinchalik ishlash uchun qaytadan ruxsatnoma olishi zarur. Shu sababli markazda erta tongdan kechgacha navbatlar kuzatilmoqda.
“Avvallari Qozog‘istonda ishlash uchun ruxsatnoma Migratsiya politsiyasi boshqarmasi xodimlari tomonidan berilgan bo‘lsa, endi Mehnat vazirligi tomonidan berilmoqda. Shu sababli barcha chet elliklar Aholiga xizmat ko‘rsatish markazlariga borib, hujjatlarini topshirmoqda. O‘zbekistonda chet elga chiqish pasporti joriy qilindi, oddiy pasport bilan endi chet elda ishlashga ruxsat berilmaydi. Agar bizning bazamizda ularning yashil pasporti turgan bo‘lsa, birdan rad javobi olishadi”, — deya aniqlik kiritdi “Hukumat fuqarolar uchun” davlat korporatsiyasi Atirau filiali boshlig‘i o‘rinbosari Jalgas Jarasov.
Aholiga xizmat ko‘rsatish markazi mutaxassislari joriy oy o‘rtalariga kelib, O‘zbekiston fuqarolari oqimi kamayishiga umid qilmoqda. Bir kunda markazga qariyb 1000 kishi hujjatlarini topshirmoqda, xodimlar ularning ko‘pchiligini ro‘yxatga olishga ulgurgan.
Jarasov qayd etishicha, tashrif buyuruvchilar uchun barcha sharoitlar yaratilgan — quyoshdan pana qilingan shiyponchalar va o‘rindiqlar o‘rnatilgan. Biroq yuzlab o‘zbekistonliklar navbat kutmoqda.
“Tonggi 4 da kelganimda, olomon to‘planib ulgurgandi. Bugun ham ulgurmayman, odamlar juda ko‘p. Men ishlaymanmi yoki shu yerda kutib o‘taraveramanmi?” — dedi O‘zbekiston fuqarosi Ibrohim Bahromov.
Barcha sharoitlar yaratilgan, deyishganiga qaramasdan, nashr muxbirlari tashrifi chog‘ida O‘zbekiston fuqarolari yo‘laklarda o‘tirardi, ularning bir qismi esa ko‘chada, quyosh ostida turardi, deyiladi xabarda.
Izoh (0)