Bugun, 13-iyun kuni Senatda “Davlat mulkini boshqarish to‘g‘risida”gi qonun muhokama qilindi. Bu haqda “Daryo” muxbiri xabar bermoqda.
Qonunda davlat mulkini boshqarish prinsiplari, unga egalik qilish mezonlari belgilanmoqda. Davlat mulki respublika hamda munitsipal mulk turlariga ajratilmoqda.
“Olmaliq kon-metallurgiya kombinati” AJ boshqaruvi raisi Abdulla Xursanovning ma’lum qilishicha, qonun bilan davlat mulkidan foydalanishda qa’tiy talablar qo‘yilmoqda.
“Shu paytga qadar davlat mulkini boshqarish samaradorligi qay darajada ekani, qancha davlat mulki borligi va ular qaysi manbalar hisobidan boshqarilayotgani to‘g‘risidagi ma’lumotlar oshkor etilmayotgan edi. Mazkur qonun asosida davlat mulki bilan bog‘liq barcha ma’lumotlar oshkor qilinadi. Yana bir muhim masala, qonunda sog‘lom raqobatni rivojlantirish ko‘zda tutilmoqda. Hujjat bilan davlat va nodavlat korxonalariga teng imkoniyat berish, ya’ni davlat korxonalariga qo‘shimcha imtiyozlar berilmasligi belgilanmoqda. Shuningdek, qonun asosida davlat mulkidan foydalanish samaradorligini baholash mexanizmi joriy etiladi. Ortiqcha yoki maqsadga muvofiq foydalanilmagan mulk tortib olinib, samarali boshqaruvga beriladi. Eng muhimi, davlat mulkini boshqarishda hisobdorlik, shaffoflik va ma’lumotlarni oshkor qilinishi belgilanmoqda. Bu davlatning iqtisodiyotdagi ishtirokini kamaytirishga xizmat qiladi”, – dedi kompaniya rahbari.
Majlisda Senat qo‘mitasi raisi Odiljon Eminov ham o‘z firklarini bildirdi.
“Davlat – eng yomon tadbirkor. Bugun O‘zbekiston yalpi ichki mahsulotining qariyb yarmi davlat korxonalari hissasiga to‘g‘ri keladi. Hozirda iqtisodiyotda davlat ulushini qisqartirish muhim ahamiyatga ega. Qonun ushbu maqsadlarga ham xizmat qiladi. Shu bilan birga, davlat mulkidan oqilona va ehtiyotkorona foydalanishda samarali imkoniyatlar yaratadi”, – dedi senator.
Izoh (0)