“O‘zbek ayoli nimalarga qodirligini namoyon etib ketdi” — Tanzila Norboyeva O‘zbekiston qahramoni Lolaxon Murodovaning vafoti haqida

Bugun, 13-iyun kuni Oliy Majlis Senatining 27-yalpi majlisi bo‘lib o‘tmoqda. Yig‘ilish avvalida parlament yuqori palatasi raisi Tanzila Norboyeva O‘zbekiston qahramoni Lolaxon Murodovaning vafoti barchani qayg‘uga solganini aytdi.

Tanzila Norboyevaning aytishicha, Lolaxon Murodova nafaqat fermer, balki deputat va senator sifatida ham faol bo‘lgan.

Mamlakatimiz ijtimoiy-siyosiy, iqtisodiy hamda ma’naviy hayoti bilan bog‘liq bir qator muhim voqealar sodir bo‘ldi. Avvalo shuni aytish kerakki, Farg‘ona viloyatining Oltiariq tumanidagi “Nurli obod” fermer xo‘jaligi rahbari, O‘zbekiston Qahramoni, taniqli jamoat arbobi Lolaxon Murodovaning vafoti barchamizni qayg‘uga soldi.

O‘zining kamtarligi, samimiyligi hamda fidoyiligi bilan Lola opa hammaning qalbidan joy olgandi. Butun umr dala bilan tillashib, tunlarni tongga ulab mehnat qilgan Lola Murodova o‘z hayoti davomida zahmatkash o‘zbek ayoli nimalarga qodir ekanini namoyon etib ketdi.

U kishi biz bilan yonma-yon turib, xalq deputatlari Farg‘ona viloyati kengashi deputati, Oliy Majlis Senati a’zosi sifatida respublikaning ijtimoiy-siyosiy hayotida ham har tomonlama faol ishtirok etdi. Lola Murodovaning o‘z vataniga bo‘lgan cheksiz mehr-muhabbati, davlat taraqqiyoti yo‘lidagi jonfidoligi avlodlar uchun hamisha o‘rnak bo‘lib qoladi. Opani mamlakat taraqqiyoti uchun qo‘shgan hissasi yodimizdan chiqmaydi”, – dedi Senat rahbari.