Germaniya kansleri Olaf Shols iyun oyida Fransiya prezidenti Emmanuel Makron va Italiya bosh vaziri Mario Dragi bilan Kiyevga tashrif buyurishni rejalashtirmoqda, deb yozdi Bild jurnalisti Paul Ronsxaymer Twitter’da.
Unga ko‘ra, siyosatchilar 26—28-iyun kunlari bo‘lib o‘tadigan G7 sammiti oldidan Ukraina prezidenti Vladimir Zelenskiy bilan uchrashmoqchi.
T-online nashri Bild’ga tayanib yozishicha, Fransiya va Ukrainadagi hukumat manbalari ushbu mavzu bo‘yicha uzoq vaqtdan beri davom etayotgan muzokaralar haqida nashrga ma’lum qilgan. Makron tashrifni Fransiyadagi parlament saylovlaridan keyin amalga oshirish fikrida turib olgan — saylovlar 12—19 iyun kunlari bo‘lib o‘tadi.
Avvalroq Europe 1 manbalari Makronning yaqin haftalarda kutilayotgan Kiyevga safari haqida xabar bergan edi. Radiostansiya ma’lumotlariga ko‘ra, ushbu tashrif chog‘ida Fransiya rahbari Ukrainaga yana oltita 155 millimetrli Caesar o‘ziyurar artilleriya moslamalari topshirilishi haqida e’lon qilishi mumkin. Bunday qurollarning birinchi oltitaligi aprel oyining oxirida Kiyevga yetkazilgan.
Aprel oyida La Repubblica ham Dragining Ukrainaga ehtimoliy tashrifi haqida yozgan edi.
May oyida Shols Germaniya prezidenti Frank-Valter Shtaynmayerdan oldin Kiyevga kela olmasligini aytgan edi. Shtaynmayer aprel oyida Polsha, Litva, Latviya va Estoniya prezidentlari bilan birga Ukraina poytaxtiga kelmoqchi bo‘lgan, biroq uning Ukrainaga tashrifi rad etilgan. Bild manbalariga ko‘ra, bunga Germaniya prezidentining Rossiya bilan “yaqin aloqalari” va “Shimoliy oqim 2”ni qo‘llab-quvvatlashi sabab bo‘lgan.
Shols Ukrainada jangovar harakatlar boshlanganidan beri Kiyevga tashrif buyurmagani uchun tanqid qilindi. Ukraina elchisi Andriy Melnik “Germaniya siyosatining sustligi” haqida gapirdi, uning fikricha, Rossiya bosqini boshlanganidan beri Germaniya federal hukumatining birorta vakili ham mamlakatga tashrif buyurmagani shundan dalolat beradi.
Shundan so‘ng Zelenskiy kanslerga 9-may kuni Kiyevga kelishni taklif qildi, biroq tashrif amalga oshmadi.
Izoh (0)