AQSH prezidenti Jo Bayden AQSH Ukraina hukumatini yaqinlashib kelayotgan Rossiya bosqinidan ogohlantirganini, biroq ular buni e’tiborga olmaganini aytdi, deb yozmoqda The Guardian.
“Ikkinchi jahon urushidan beri bunday hodisa yuz bermagan. Bilaman, ko‘pchilik meni bo‘rttirib yuborayapdi, deb o‘ylagan”, — dedi Bayden Los-Anjelesdagi tadbirda.
“Ammo bilardim, bizda (Putinning) chegarani kesib o‘tishga tayyorlanayotganini tasdiqlovchi ma’lumotlar bor edi. Hech qanday shubha bo‘lmagan”, — dedi AQSH prezidenti va “Zelenskiy buni eshitishni istamadi” deya qo‘shimcha qildi.
Ukraina prezident ofisi rahbarining maslahatchisi Mixail Podolyak Twitter’da Baydenning bayonotlarini quyidagicha izohladi: “Ukraina o‘tgan yildan beri urushga tayyorgarlik ko‘rmoqda: bo‘lajak bosqin haqidagi ma’lumotlarni nafaqat G‘arb razvedkasi, balki biznikilar ham bergan”.
“Asosiy davlatlar juda yaxshi bila turib ham Rossiyaning militaristik ishtahasini to‘xtata olmagan ekan, 100 kundan ko‘proq vaqt davomida o‘zidan kuchli raqibga qarshi to‘laqonli urushda samarali kurashayotgan mamlakatni biror nimada ayblash be’manilik”, — deb yozgan Podolyak.
Rossiya harbiylari 2021-yilning kuzida Ukraina chegarasi yaqinida keng ko‘lamli manyovrlar o‘tkazishni boshlagan edi. G‘arb razvedkasi buni bosqinga tayyorgarlik belgisi sifatida ko‘rgan. Rossiya rasmiylari esa buni odatiy mashg‘ulotlar deya da’vo qilgan.
Izoh (0)