Германия канцлери Олаф Шольц июнь ойида Франция президенти Эммануэль Макрон ва Италия бош вазири Марио Драги билан Киевга ташриф буюришни режалаштирмоқда, деб ёзди Bild журналисти Паул Ронсхаймер Twitter’да.
Унга кўра, сиёсатчилар 26—28 июнь кунлари бўлиб ўтадиган G7 саммити олдидан Украина президенти Владимир Зеленский билан учрашмоқчи.
Т-online нашри Bild’га таяниб ёзишича, Франция ва Украинадаги ҳукумат манбалари ушбу мавзу бўйича узоқ вақтдан бери давом этаётган музокаралар ҳақида нашрга маълум қилган. Макрон ташрифни Франциядаги парламент сайловларидан кейин амалга ошириш фикрида туриб олган — сайловлар 12—19 июнь кунлари бўлиб ўтади.
Аввалроқ Europe 1 манбалари Макроннинг яқин ҳафталарда кутилаётган Киевга сафари ҳақида хабар берган эди. Радиостанция маълумотларига кўра, ушбу ташриф чоғида Франция раҳбари Украинага яна олтита 155 миллиметрли Caesar ўзиюрар артиллерия мосламалари топширилиши ҳақида эълон қилиши мумкин. Бундай қуролларнинг биринчи олтиталиги апрель ойининг охирида Киевга етказилган.
Апрель ойида La Repubblica ҳам Драгининг Украинага эҳтимолий ташрифи ҳақида ёзган эди.
Май ойида Шольц Германия президенти Франк-Валтер Штайнмаердан олдин Киевга кела олмаслигини айтган эди. Штайнмаер апрель ойида Польша, Литва, Латвия ва Эстония президентлари билан бирга Украина пойтахтига келмоқчи бўлган, бироқ унинг Украинага ташрифи рад этилган. Bild манбаларига кўра, бунга Германия президентининг Россия билан «яқин алоқалари» ва «Шимолий оқим 2»ни қўллаб-қувватлаши сабаб бўлган.
Шольц Украинада жанговар ҳаракатлар бошланганидан бери Киевга ташриф буюрмагани учун танқид қилинди. Украина элчиси Андрий Мелник «Германия сиёсатининг сустлиги» ҳақида гапирди, унинг фикрича, Россия босқини бошланганидан бери Германия федерал ҳукуматининг бирорта вакили ҳам мамлакатга ташриф буюрмагани шундан далолат беради.
Шундан сўнг Зеленский канцлерга 9 май куни Киевга келишни таклиф қилди, бироқ ташриф амалга ошмади.
Изоҳ (0)