“G‘arb Ukrainaga yadro qurolini ‘sovg‘a qilish‘ huquqiga ega” — Yevroparlament deputati

Polshaning sobiq Tashqi ishlar vaziri, amaldagi Yevroparlament deputati Radoslav Sikorskiy Ukraina xavfsizlik kafolatlari evaziga yadro qurolidan voz kechgan Budapesht memorandumining qoidalarini eslab o‘tdi. Uning fikricha, Moskva ushbu hujjatda belgilangan majburiyatlarni buzgan.

Sikorskiyning aytishicha, Rossiya Budapesht memorandumi qoidalarini buzgan, shu bois G‘arb davlatlari Ukrainaga yadro qurolini “sovg‘a qilish” huquqiga ega. Bu haqda u Espresso telekanali efirida gapirgan.

“Ma’lumki, 1994-yil, Budapesht memorandumi imzolangandan keyin Ukraina o‘zining yadroviy salohiyatidan voz kechdi. Bugun ruslar va ba’zilar bu hujjat Ukraina(mustaqilligining)ning kafolati bo‘lmaganini aytmoqda, lekin o‘shanda hamma Ukraina yadro qurolidan voz kechish evaziga SSSR davrida o‘rnatilgan chegaralar doirasida mustaqil davlat bo‘lishini tushungandi” — deya o‘z so‘zlarini tushuntiradi Sikorskiy.

Ma’lumot uchun, Budapesht memorandumi 1994-yil 5-dekabrda Ukraina, Rossiya, Buyuk Britaniya va AQSh tomonidan imzolangan. Hujjatda Ukrainaga o‘z yadro qurolidan voz kechishi evaziga bir qator xavfsizlik kafolatlari berilgan. Shartnomaga imzo qo‘ygan davlatlar Ukrainaning mustaqilligi, suvereniteti va chegaralarini hurmat qilishga, uning hududiy yaxlitligiga tahdid solmaslikka va’da bergan, jumladan, Rossiya ham.

Shu yilning 19-fevral kuni Ukraina prezidenti Vladimir Zelenskiy maslahatlashuvlar uchun Budapesht memorandumiga a’zo davlatlar sammitini chaqirish istagi borligini ma’lum qilgandi. “Agar sammit yig‘ilmasa, Ukraina bu hujjatni bekor qilishi mumkin” — degandi u.