Япония ҳукумати COVID-19 пандемияси сабаб хорижий сайёҳлар учун қўйилган чекловларни юмшатди ва мамлакатга кириш учун берилган аризаларни қабул қилишни бошлади, дея хабар беради Associated Press нашри.
Япония Туризм агентлиги 10 июнь, жума куни мамлакат 98 давлат, жумладан, Россия, АҚШ, Буюк Британия, Хитой ва Жанубий Кореядан сайёҳларнинг кириш аризаларини қабул қила бошлаганини маълум қилди. Мамлакатга биринчи сайёҳлар июль ойида келиши кутилмоқда.
Ҳозирча мамлакатга ташриф буюриш фақат уюшган туристик гуруҳларга рухсат этилган ва мамлакат расмийларининг фикрича, чет эллик меҳмонлар Японияга якка тартибда келишлари учун бироз вақт керак бўлади.
Қоидаларга кўра, сайёҳлар кўп вақт ниқоб тақиб юриши шарт. Шунингдек, улар COVID-19 билан касалланган тақдирда, тиббий харажатларни қоплаш учун суғурта сотиб олишлари керак бўлади. Битта туристик гуруҳдаги одамлар сони бўйича ҳеч қандай чекловлар йўқ, аммо саёҳат давомида гуруҳга гид ҳамроҳлик қилиши лозим.
Японияда халқаро туризмнинг қисман тикланиши май ойининг охирида ўтказилган тажрибага асосланган тавсияларга мос келади. Ушбу тажрибада 50 га яқин киши, асосан Австралия, Сингапур, Таиланд ва АҚШдан келган сайёҳлик агентликлари ходимлари иштирок этганди.
Жорий йилнинг бошида Япония ўзининг қаттиқ чегара назорати сабаб ксенофобияда (бегона ва нотаниш нарсаларга нисбатан муросасизлик) айбланган, шундан сўнг мамлакат ҳукумати чекловларни аста-секин юмшата бошлаганди. 1 июнь куни мамлакат ҳукумати Япония фуқаролари, чет эллик талабалар ва ишбилармон саёҳатчиларни ҳисобга олган ҳолда Японияга чет эл фуқаролари киришнинг рухсат этилган сонини кунига 20 минг кишига оширди.
Изоҳ (0)