Ukraina prezident ofisi rahbarining maslahatchisi Mixail Podolyakning BBC’ga aytishicha, urushda har kuni 100 nafardan 200 nafargacha ukrainalik askar halok bo‘lmoqda.
Podolyakning so‘zlariga ko‘ra, qurbonlar soni bunchalik ko‘pligiga asosiy sabablardan biri Ukraina va Rossiya harbiy salohiyati o‘rtasidagi notenglikdir.
Prezident ofisi vakilining fikricha, Ukrainaga G‘arb davlatlarining “yuzlab eng kuchli artilleriya tizimlari” zarur, shuningdek, Rossiyaning o‘t ochish kuchiga tenglashish va bosib olingan hududlarni ozod qilish uchun 300 tagacha raketa tizimlari kerak.
BBC ma’lumotlariga ko‘ra, Mixail Podolyakning har kuni 100-200 nafargacha askar o‘layotgani haqidagi ma’lumotlari Ukraina rasmiylari tomonidan urush boshidan beri e’lon qilingan kunlik yo‘qotishlarning maksimal sonidir.
1-iyun kuni Ukraina prezidenti Vladimir Zelenskiy har kuni jang maydonida 60-100 nafar ukrainalik askarlar halok bo‘layotgani, 500 ga yaqin odam yaralanayotgani haqida aytgandi. 9-iyun kuni esa Ukraina mudofaa vaziri Oleksiy Reznikov Donbassda kuniga 100 ga yaqin odam halok bo‘layotganini ma’lum qildi.
Ukraina ham, Rossiya ham qo‘shinlarining urushdagi yo‘qotishlari haqida muntazam ravishda xabar bermayapti. Rossiya Mudofaa vazirligi bu ma’lumotni ikki marta, oxirgi marta 25-mart kuni e’lon qilgandi — o‘shanda 1351 kishi halok bo‘lgani va 3825 kishi yaralangani haqida xabar berilgan. Aprel oyi o‘rtalarida esa Vladimir Zelenskiy urush boshidan beri 2500 dan 3000 gacha ukrainalik harbiy xizmatchi halok bo‘lganini, yana 10 mingga yaqini yaralanganini aytdi.
Ukrainada, Rossiyada bo‘lgani kabi, harbiy harakatlar paytida o‘z armiyasining yo‘qotishlarini oshkor qilish qonun bilan taqiqlangan. Ukraina prezident ofisi rahbarining maslahatchisi Aleksey Arestovichning aytishicha, bunday ma’lumotlar davlat siri hisoblanadi, bu ma’lumotlarning oshkor etilishi “dushmanga uning harakatlari samaradorligini baholashga yordam berishi mumkin”.
Izoh (0)