Америка маъмурияти мамлакатга кириб келаётган сайёҳлар учун коронавирусга нисбатан ПЗР-тестдан ўтиш мажбурияти бекор қилинишини эълон қилди, деб ёзади «Интерфакс».
«АҚШ касаллаиклар назорати ва профилактикаси марказлари илмий маълумотлар асосида шундай қарорга келишдики, айни вақтда бу талабга зарурат йўқолмоқда», — деди АҚШ президенти маъмуриятининг юқори мансабли вакили.
Шу билан бирга, у эпидемиологик вазият кескин ёмонлашган тақдирда, бу мажбурият қайта жорий этилиши мумкинлигини таъкидлади.
Таъкидланишича, ушбу директива ҳар 90 кунда қайта кўриб чиқилиб, тестдан ўтиш талабини қайта жорий қилиш зарурияти бор-йўқлиги баҳоланади.
Тестдан ўтказиш бекор қилинишини ёқлаб Америка сайёҳлик саноати вакиллари фаол чиқишлар қилган эди.
«Бугунги кун АҚШга авиаташувларни ва халқаро сафарларни қайта тиклаш йўлидаги яна бир муҳим қадам бўлди. Байден маъмуриятини ушбу хатти-ҳаракатлар учун мақтаса арзийди, натижада бутун дунёдан сайёҳлар қайтиб келишига йўл очилади ва АҚШ сайёҳлик тармоғининг қайта тикланиши тезлашади», — дея ушбу янгиликни изоҳлади АҚШ Сайёҳлик уюшмаси бош директори Рожер Доу.
Унинг сўзларига кўра, мажбурий тестдан ўтиш талабининг бекор қилиниши 2022 йил охиригача АҚШга қўшимча 5,4 миллион сайёҳни сафарларга харажатлар кўринишида қўшимча 9 миллиард долларни жалаб қилиши мумкин.
Мажбурий тестдан ўтиш талаби расман 12 июнь куни 12:01 да (Тошкент вақти билан 21:01 да) бекор бўлади.
Эслатиб ўтамиз, 1 июндан бошлаб Туркияга кириш учун сайёҳлардан ПЗР-тести ёки тезкор антиген тестининг салбий натижаларини кўрсатиш талаб этилмайдиган бўлди. Италия ҳам мамлакатга кириш учун барча антиковид чекловларини бекор қилганди, Испания эса эмланмаган сайёҳларнинг мамлакат ҳудудига киришига рухсат берган. Аввалроқ яна тўққизта давлат, жумладан, Исроил, Индонезия, Марокаш, Австрия, Вьетнам, Малайзия, Таиланд, Арманистон, Қирғизистон ПЗР-тестининг салбий натижасини тақдим этиш тартибини бекор қилиб, кириш талабларини енгиллаштирган эди.
Изоҳ (0)