NATO bosh kotibi Yens Stoltenbergga temiratki (opoyasivayushiy lishay) kasalligi tashxisi qo‘yildi. Shu sababli u uydan ishlamoqda, Germaniya va Ruminiyada o‘tkazilishi kerak bo‘lgan muzokaralarni esa masofadan turib olib boradi. Bu haqda Reuters NATO vakiliga tayanib xabar berdi.
“Bosh kotib Germaniyaga (va Ruminiyaga) rejalashtirilgan tashrifini shaxsan emas, masofadan turib amalga oshiradi”, — dedi manba va bosh kotibdagi kasallik koronavirusdan keyin paydo bo‘lgan bo‘lishi mumkinligini qo‘shimcha qildi.
Stoltenberg 9-iyun kuni Berlinda Germaniya kansleri Olaf Shols bilan uchrashishi, ertasiga esa Buxarestda Ruminiya, Polsha va Vengriya rahbarlari bilan uchrashuvda ishtirok etishi kerak edi.
Germaniya Mudofaa vazirligining xabar berishicha, NATO bosh kotibi Berlinga tashrifi chog‘ida vazirlik rahbari Kristina Lambrext bilan ham uchrashishi, ular qo‘shma bayonot chiqarishi zarur edi. Uchrashuvda bir nechta mavzular — Sharqiy qanotdagi qo‘shinlarni yanada kuchaytirish bo‘yicha taklif, oy oxirida Madridda o‘tkaziladigan NATO sammitiga tayyorgarlik, kelasi hafta alyans mudofaa vazirlari yig‘ilishi, blokning yangi strategik konsepsiyasi, shuningdek, Finlyandiya va Shvetsiyaning unga kirishi masalalari muhokama qilinishi rejalashtirilgan edi.
63 yoshli Stoltenberg may oyi boshida koronavirus bilan kasallangan. Unda kasallik yengil kechgan.
3-iyun kuni Stoltenberg AQSH prezidenti Jo Bayden bilan uchrashib, 29—30-iyun kunlari Madridda bo‘lib o‘tadigan NATO sammitini muhokama qildi. Alyans bosh kotibining ta’kidlashicha, Finlyandiya va Shvetsiya, agar Turkiya bilan kelishuvga erishmasa, NATO a’zoligiga nomzod davlatlar sifatida sammitda ishtirok eta olmaydi.
Izoh (0)