НАТО бош котиби соғлиғидаги муаммо туфайли Берлинга сафарини бекор қилди

НАТО бош котиби Йенс Столтенбергга темиратки (опоясиваюший лишай) касаллиги ташхиси қўйилди. Шу сабабли у уйдан ишламоқда, Германия ва Руминияда ўтказилиши керак бўлган музокараларни эса масофадан туриб олиб боради. Бу ҳақда Reuters НАТО вакилига таяниб хабар берди.

«Бош котиб Германияга (ва Руминияга) режалаштирилган ташрифини шахсан эмас, масофадан туриб амалга оширади», — деди манба ва бош котибдаги касаллик коронавирусдан кейин пайдо бўлган бўлиши мумкинлигини қўшимча қилди.

Столтенберг 9 июнь куни Берлинда Германия канцлери Олаф Шольц билан учрашиши, эртасига эса Бухарестда Руминия, Польша ва Венгрия раҳбарлари билан учрашувда иштирок этиши керак эди.

Германия Мудофаа вазирлигининг хабар беришича, НАТО бош котиби Берлинга ташрифи чоғида вазирлик раҳбари Кристина Ламбрехт билан ҳам учрашиши, улар қўшма баёнот чиқариши зарур эди. Учрашувда бир нечта мавзулар — Шарқий қанотдаги қўшинларни янада кучайтириш бўйича таклиф, ой охирида Мадридда ўтказиладиган НАТО саммитига тайёргарлик, келаси ҳафта альянс мудофаа вазирлари йиғилиши, блокнинг янги стратегик концепцияси, шунингдек, Финляндия ва Швециянинг унга кириши масалалари муҳокама қилиниши режалаштирилган эди.

63 ёшли Столтенберг май ойи бошида коронавирус билан касалланган. Унда касаллик енгил кечган.

3 июнь куни Столтенберг АҚШ президенти Жо Байден билан учрашиб, 29—30 июнь кунлари Мадридда бўлиб ўтадиган НАТО саммитини муҳокама қилди. Альянс бош котибининг таъкидлашича, Финляндия ва Швеция, агар Туркия билан келишувга эришмаса, НАТО аъзолигига номзод давлатлар сифатида саммитда иштирок эта олмайди.