AQSH Kubaga qarshi sanksiyalarni yumshatdi, Venesuelaga qo‘yilgan cheklovlarning ham bir qismini olib tashlamoqchi

AQSH Moliya vazirligi Kubaga qarshi kiritilgan sanksiyalarni yumshatdi — guruhli ta’lim sayohatlari va konferensiyalarda qatnashish uchun safarlarga ruxsat berildi, qarindoshlarga pul o‘tkazish limiti olib tashlandi. Sanksiyalarning yumshatilishi haqida Los-Anjelesdagi Amerika sammiti fonida e’lon qilindi (unga Kuba taklif etilmagan). Shuningdek, AQSH Venesueladagi siyosiy inqiroz bartaraf etilsa, unga nisbatan ham sanksiyalarning bir qismini bekor qilish masalasini ko‘rib chiqmoqda. Bu haqda AQSH prezidenti Jo Bayden sammitga mamlakat vakili sifatida kelgan Venesuela muxolifati yetakchisi Xuan Guaydoga ma’lum qildi.

“Kubaga guruhli ta’lim safarlari uchun ruxsat berildi, ta’lim faoliyatidagi bir qator cheklovlar olib tashlandi, Kubadagi professional uchrashuvlar va konferensiyalarda qatnashish yoki mamlakatda ularni o‘tkazish uchun safarga ruxsat berildi, qarindoshlarga pul o‘tkazmalaridagi cheklov olib tashlandi, shuningdek, Kubaga xayriya qilishga ruxsat berildi”, — deyiladi AQSH Moliya vazirligi veb-saytida e’lon qilingan Kuba aktivlarini nazorat qilish bo‘yicha tuzatishlarda. Iyun oyi boshida AQSH “kubaliklarni qo‘llab-quvvatlash zarurligi”ni ta’kidlab, Kuba bilan havo qatnoviga qo‘yilgan cheklovlarni bekor qilgandi.

Oq uyga ko‘ra, Jo Bayden Xuan Guaydo bilan uchrashuvda Vashington Karakasga nisbatan sanksiyalarni yumshatishga tayyorligini ma’lum qilgan. “Prezident Bayden AQSH Venesuela xalqiga o‘z mamlakati kelajagini belgilash imkonini beradigan muzokaralar natijalariga ko‘ra sanksiyalar siyosatini o‘zgartirishga tayyorligini yana bir bor tasdiqladi”, — deyiladi Oq uy bayonotida.

AQSH Guaydoni Venesuela prezidenti deb biladi, so‘nggi saylovda g‘alaba qozonganini e’lon qilgan Nikolas Maduroni esa tan olmaydi. Venesuelaga qarshi og‘ir sanksiyalar mavjud, ular, jumladan, neft eksportiga ham ta’sir qiladi. Avvalroq AQSH moliya vazirligi Amerikaning Chevron neft kompaniyasiga Venesueladagi kelgusi faoliyati bo‘yicha muzokaralarni boshlash imkonini beruvchi litsenziya bergan edi. Reuters xabariga ko‘ra, Qo‘shma Shtatlar Rossiyaga qarshi sanksiyalarning Yevropa uchun oqibatlarini yumshatish maqsadida Venesuela neftiga nisbatan sanksiyalarni yumshatish niyatida.