AQSH vakillar palatasining qurolli kuchlar bo‘yicha qo‘mitasi xususiy sun’iy yo‘ldoshlardan razvedka olib borish, shu jumladan, Ukrainadagi vaziyatni kuzatish uchun foydalanishni kengaytirishga qaror qildi, deb yozadi “RBK”.
Kongressmenlar 2023-moliya yili uchun (1-oktabrda boshlanadi) mudofaa budjeti loyihasiga tuzatishlar kiritdi. Ular Milliy razvedka boshqarmasiga (NRO) sintezlangan aperturali radiolokator o‘rnatilgan (Synthetic Aperture Radar, SAR) sun’iy yo‘ldoshlardan tasvirlar qabul qilish bo‘yicha tajribaviy dasturni tezlashtirishni taklif etadi.
NRO Ukrainadagi Amerika xususiy kompaniyalariga tegishli SAR sun’iy yo‘ldoshlari ma’lumotlaridan faol foydalanib, jangovar harakatlar borishini kuzatgan va razvedka ma’lumotlarini olgan, keyin esa ittifoqchilarga va Kiyevga uzatgan, deb yozadi Defence News nashri.
SAR bilan jihozlangan sun’iy yo‘ldoshlar har qanday ob-havoda va kunning istalgan qismida katta hajmli tasvirlarni oladi. NRO’ning o‘z qurilmalari bor, ammo ulardagi tasvirlar maxfiylashtirilgan. Ularni maxfiylikdan chiqarib, ma’lumotlarni ittifoqchilarga uzatish uchun juda ko‘p vaqt kerak bo‘ladi. AQSH harbiy-kosmik razvedkasi ma’lumotlari bilan bog‘liq vaziyat ham xuddi shunday. Xususiy kompaniyalar olgan tasvirlar esa zudlik bilan uzatilishi mumkin.
Aprelda NRO rahbari Kris Skoleze AQSH Ukrainadagi jangovar harakatlar borishini ikkita eng yangi sun’iy yo‘ldosh tizimlari yordamida kuzatayotganini ma’lum qilgandi, ular orbital josus yo‘ldoshlar bilan bir qatorda “NATO va butun dunyoga real vaqt rejimida Rossiyaning bosqini oldidan o‘z harbiy qudratini oshirayotganini kuzatish imkonini bergan”. Skolezening so‘zlariga ko‘ra, buning sharofati bilan Amerika ma’muriyati Rossiya armiyasi manyovrlari, raketa parvozlari va ehtimoliy strategik nishonlar haqida batafsil razvedka ma’lumotlari olib turgan.
Avvalroq The New York Times (NYT) Qo‘shma Shtatlar Ukrainaga razvedka ma’lumotlarini uzatayotgani, Kiyev ushbu ma’lumotlar yordamida Rossiya harbiylariga zarba bergani haqida xabar bergandi. G‘arbning Ukrainaga yuborayotgan razvedka ma’lumotlari Rossiyaning maxsus operatsiyadagi maqsadlariga erishishiga to‘sqinlik qilmaydi, dedi Kreml matbuot kotibi Dmitriy Peskov bunga javoban.
Izoh (0)