Maymunchechak bilan qayta kasallanish mumkin, bunday holatlar qayd etilgan. Bu haqda Jahon sog‘liqni saqlash tashkiloti (JSST)ning favqulodda vaziyatlar dasturi chechakka qarshi kurashish kotibiyati rahbari Rozamund Lyuis brifingda ma’lum qildi, deb yozadi “RBK”.
“Maymunchechakka nisbatan umrbod immunitetga kelsak, u tabiiy chechakka o‘xshab paydo bo‘lishi mumkin. Biroq biz G‘arbiy Afrikada avval maymunchechak bilan aloqada bo‘lgan shifokor keyinroq yana kasallanganini ko‘rdik”, — dedi doktor.
JSST rahbari Tedros Gebreyesus maymunchechakka qarshi umumiy vaksinatsiyani amalga oshirish tavsiya etilmasligini ta’kidladi, chunki bunday vaksinalar mavjud bo‘lgan sanoqli joylarda ular kasallanish xavfi ancha yuqori bo‘lgan odamlarni himoya qilish uchun qo‘llanilmoqda.
Gebreyesus maymunchechak tarqalishi odatiy hol bo‘lgan mamlakatlardan tashqarida kasallanganlar soni 1 ming kishidan oshganini ma’lum qildi. Bunday holatlar haqidagi ma’lumotlar 29 ta davlatdan kelib tushgan.
Ayni vaqtda, Rossiya sog‘liqni saqlash vaziri Mixail Murashko Rossiyada chechakning oldini olish uchun yangi vaksina hamda uni davolash uchun dorilar sinovdan o‘tkazilayotganini ma’lum qildi. Sinovlarning oraliq natijalari qanday bo‘lgani va yangi dorilar qachon sotuvga chiqarilishiga aniqlik kiritilmadi.
May oyida “Vektor” ilmiy markazi vakillari tabiiy chechakka qarshi vaksina maymunchechakka qarshi ham samarali ekanini ma’lum qilgandi.
Izoh (0)