Amerika maxsus xizmatlari Ukraina harbiy strategiyasi va rejalari, uning talafotlari va harbiy harakatlar to‘g‘risidagi boshqa ma’lumotlar bo‘yicha to‘liq tasavvurga ega emas. Bu haqda The New York Times (NYT) o‘z manbalariga tayanib xabar bermoqda, deb yozadi “Kommersant”.
“Amerika maxsus xizmatlarida Ukrainadagi operatsiyalar haqidagi ma’lumot o‘zlari istaganidan ancha kam, ularning Rossiya armiyasi, u rejalashtirgan operatsiyalar, uning muvaffaqiyatlari va omadsizliklari borasida ko‘proq tasavvurga ega”, — deb yozadi gazeta razvedkaning amaldagi va sobiq xodimlariga tayanib.
Qayd etilishicha, bu, xususan, Amerika maxsus xizmatlari ko‘proq AQSHga dushman mamlakatlar, masalan, Rossiya haqidagi ma’lumotlarni to‘plashga e’tibor qaratishi bilan bog‘liq.
Bundan tashqari, NYT yozishicha, Ukraina hukumati, ehtimol, AQSHga noto‘liq ma’lumot yetkazayotgan bo‘lishi mumkin, masalan, harbiy xizmatchilar orasidagi va texnika bo‘yicha yo‘qotishlar haqida. NYT manbalari fikricha, bunga bir nechta sabablar bor. Ulardan biri shuki, Ukraina jamoatchilikka yoki sheriklariga o‘z zaifliklarini ko‘rsatishni yoki ularda Ukraina g‘alaba qozonolmaydi degan tasavvur uyg‘otishni istamaydi. Bundan tashqari, Ukraina hukumati yillar davomida o‘z maxfiy ma’lumotlari himoyasini mustahkamlab kelgan — ularni boshqa mamlakatlar bilan bo‘lishish ushbu ma’lumotlar Rossiya qo‘liga tushib qolishi xavfi ostida qoldirish demakdir.
Kolumbiya universiteti xalqaro aloqalar professori Stiven Bidl fikricha, Ukrainada bunday qilish uchun barcha asoslar bor. “Agar natija Rossiyaning harbiy pozitsiyalarini mustahkamlashga xizmat qilsa, ukrainlarning o‘z talafotlari borasida ochiqligi Amerika yoki Ukraina jamoatchiligi manfaatlariga mos keladi, deb o‘ylamayman”, — dedi u.
Eslatib o‘tamiz, AQSH Ukrainadagi vaziyatni kuzatish uchun sun’iy yo‘ldoshlardan foydalanishni kengaytirishga qaror qildi. SAR bilan jihozlangan sun’iy yo‘ldoshlar har qanday ob-havoda va kunning istalgan qismida katta hajmli tasvirlarni oladi. NRO’ning o‘z qurilmalari bor, ammo ulardagi tasvirlar maxfiylashtirilgan. Ularni maxfiylikdan chiqarib, ma’lumotlarni ittifoqchilarga uzatish uchun juda ko‘p vaqt kerak bo‘ladi. AQSH harbiy-kosmik razvedkasi ma’lumotlari bilan bog‘liq vaziyat ham xuddi shunday. Xususiy kompaniyalar olgan tasvirlar esa zudlik bilan uzatilishi mumkin.
Avvalroq The New York Times (NYT) Qo‘shma Shtatlar Ukrainaga razvedka ma’lumotlarini uzatayotgani, Kiyev ushbu ma’lumotlar yordamida Rossiya harbiylariga zarba bergani haqida xabar bergandi. G‘arbning Ukrainaga yuborayotgan razvedka ma’lumotlari Rossiyaning maxsus operatsiyadagi maqsadlariga erishishiga to‘sqinlik qilmaydi, dedi Kreml matbuot kotibi Dmitriy Peskov bunga javoban.
Izoh (0)