Қозоғистонда ўтказилган референдум натижалари эълон қилинди

Референдум ўтказиш бўйича Қозоғистон Марказий комиссияси республикада ўтказилган референдумининг якуний натижаларини эълон қилди, дея хабар бермоқда Tengrinews.

Марказий Сайлов Комиссияси маълумотларига кўра, сайлов ҳуқуқига эга бўлган 11 миллион 734 минг 642 нафар фуқародан 7 миллион 985 минг 769 нафари овоз бериш жараёнида қатнашган. Бу умумий сайловчиларнинг 68,05 % ташкил қилади.

Референдумда иштирок этган фуқароларнинг 77,18 % (6 163 516 нафар киши) бюллетендаги «Қозоғистон Республикаси Конституциясига ўзгартиш ва қўшимчалар киритиш тўғрисида»ги қонун лойиҳасида назарда тутилган ўзгартириш ва қўшимчаларни Қозоғистон Республикаси Конституциясига киритишни маъқуллайсизми» деган ягона саволга «Ҳа» дея жавоб берган бўлса, 18,66 % (1 490 470 нафар) фуқаро ўзгартиришларга қарши овоз берган. 2,58 %  бюллетен эса ҳақиқий эмас деб топилган. Шунингдек, овозларни ҳисоблаш жараёнида 1,58 фоиз бюллетен ҳисобга олинмаган.

«Шу тариқа, референдум ўтган деб ҳисобланади. Референдумга қўйилган Конституцияга киритилган ўзгартиш ва қўшимчалар, агар фуқароларнинг ярмидан кўпроғи, вилоятлар, республика аҳамиятига молик шаҳарлар ва пойтахтнинг камида учдан икки қисми томонидан маъқуллаб овоз берилган бўлса, қабул қилинган ҳисобланади.

Референдумда қабул қилинган қарор мажбурийдир ва бошқа ҳужжатлар билан қўшимча тасдиқлашни талаб қилмайди. Конституцияга киритилиши кўзда тутилган, референдумда қабул қилинган ўзгартиш ва қўшимчалар референдум якунлари тўғрисидаги расмий ҳисобот эълон қилинган кундан эътиборан кучга киради» — Нурлан Абдиров, референдум ўтказиш бўйича Марказий комиссия раҳбари.

Эслатиб ўтамиз, 5 июнь куни Қозоғистонда Конституцияга ўзгартириш ва қўшимчалар киритиш бўйича республика референдуми бўлиб ўтди. Бюллетенда фақат битта савол бор эди: «Қозоғистон Республикаси Конституциясига ўзгартиш ва қўшимчалар киритиш тўғрисида»ги қонун лойиҳасида назарда тутилган ўзгартириш ва қўшимчаларни Қозоғистон Республикаси Конституциясига киритишни маъқуллайсизми?».

Референдум ўтган ҳисобланиши учун унда иштирокчилар рўйхатига киритилган фуқароларнинг ярмидан кўпи иштирок этиши лозим бўлиб, 6 июнь, соат 14:00 ҳолатига кўра, сайловда иштирок этиш чегарасига эришилган.