Serbiya OAVlari Bolgariya, Shimoliy Makedoniya va Chernogoriya hukumatlari Rossiya tashqi ishlar vaziri Sergey Lavrovning samolyoti uchun o‘z havo hududlarini yopishga qaror qilgani haqida xabar berdi, deb yozadi Meduza. 6—7-iyun kunlariga vazirning Serbiyaga tashrifi rejalashtirilgan edi.
Keyinroq Rossiya Tashqi ishlar vazirligi vakili Mariya Zaxarova ushbu uch mamlakat bortida vazir Sergey Lavrov o‘tirgan hukumat samolyoti parvozi uchun havo hududini yopganini tasdiqladi.
“Hozirgina, bir soat avval Serbiyani o‘rab turgan mamlakatlar u yerga yo‘l olgan Sergey Lavrov reysining parvoziga ruxsat bermay, aloqa kanalini yopdi. Rossiya delegatsiyasi muzokaralar o‘tkazish uchun Belgradga borishi kerak edi. Yevroittifoq va NATOga a’zo mamlakatlar havo hududini berkitdi, yana bir aloqa kanalini yopdi”, — dedi Zaxarova Italiyaning La7 telekanaliga bergan intervyusida.
Shu bilan birga, u Rossiya “temir parda” bilan o‘zini to‘sib qo‘ymoqchi emasligini ma’lum qildi.
6—7-iyun kunlari Lavrov Serbiya prezidenti Aleksandr Vuchich, tashqi ishlar vaziri Nikolay Selakovich, parlament raisi Ivitsa Dachich va serb patriarxi Porfiriy bilan uchrashishi kerak edi.
Lavrovning tashrifini tashkillashtirish bilan bog‘liq qiyinchiliklar haqida bungacha Serbiya bosh vaziri Anna Brnabich ham ma’lum qilgan va bu masala bilan prezidentning o‘zi shug‘ullanayotganini bildirgandi. Vuchich esa, o‘z navbatida, Lavrovning Serbiyaga qay tarzda yetib kelishi “murakkab masala” ekanini ta’kidlagandi.
Shundan keyin “Interfaks” Rossiya TIVdagi yuqori mansabli amaldorga tayanib, Lavrovning Serbiyaga tashrifi bekor qilinganini xabar berdi.
Ushbu voqealar fonida Vuchich 6-iyun, dushanba kuni xalqqa murojaat yo‘llashni rejalashtirib qo‘ydi.
Serbiya, Yevropaning aksariyat mamlakatlaridan farqli o‘laroq, Rossiyaning Ukrainaga bosqini boshlanganidan keyin u bilan yaxshi aloqalarni oshkora davom ettirib kelmoqda. May oxirida ikkala mamlakat prezidentlari Rossiya gazini yetkazib berish bo‘yicha yangi uch yillik bitim haqida kelishib olgandi.
Izoh (0)